6 ліпеня на фэст у гонар Маці Божай Будслаўскай у Нацыянальны санктуарый прыбыў Апостальскі нунцый Антэ Ёзіч.
Прадстаўнік Папы Францішка і сакратар Апостальскай нунцыятуры ў Беларусі Монсіньёр Кшыштаф Сэрока ўвайшлі ў Будслаў пешкі як звычайныя пілігрымы, прайшоўшы, як усе, асабісты дагляд службамі бяспекі.
Для Нунцыя Ёзіча сёлетні Будслаўскі фэст становіцца апошнім у яго служэнні на Беларусі: 28 чэрвеня Папа Францішак прызначыў Яго Апостальскім Нунцыем у Грузіі і Арменіі.
На Чырвонай плошчы перад базылікай прадстаўнікоў Папы сустрэлі Старшыня Канферэнцыі Каталіцкіх Біскупаў у Беларусі арцыбіскуп Мітрапаліт Мінска-Магілёўскі Юзаф Станеўскі, намеснік Старшыні епіскапату біскуп Віцебскі Алег Буткевіч і каад’ютар Гродзенскай дыяцэзіі біскуп Уладзімір Гуляй.
Іерархі разам прайшлі ў касцёл, дзе памаліліся перад цудадзейным абразом Маці Божай Будслаўскай.
У Будславе высокага ватыканскага іерарха сустрэлі таксама прадстаўнікі дзяржаўнай улады Мінскай вобласці і Мядзельскага раёна.
Нунцыя Ёзіча гасцінна прывіталі намеснік старшыні Мінскага аблвыканкама Аляксандр Іллясевіч, дарэчы, ураджэнец Мядзела, а таксама старшыня Мядзельскага райвыканкама Аляксандр Прановіч і старшыня Мядзельскага раённага Савета дэпутатаў Антаніна Крыўко.
Паміж прадстаўнікамі ўлады і Апостальскім нунцыем адбылася кароткая размова на тэму вялікага значэння Будслаўскага фэсту не толькі ў жыцці беларускіх католікаў, але і ў межах усёй краіны, а асабліва Міншчыны.
