У нядзелю 23 чэрвеня ў парафіі святога Яна Хрысціцеля ў Снове (Мінска-Магілёўская архідыяцэзія, Нясвіжскі дэканат) адбылася адпустовая ўрачыстасць.
Па запрашэнні душпастыра сноўскай супольнасці католікаў ксяндза Аляксандра Вітко цэлебрацыю ўрачыстай святой Імшы ўзначаліў арцыбіскуп эмэрыт Тадэвуш Кандрусевіч.
У прамоўленай гаміліі заслужаны іерарх напачатку падкрэсліў, што ў літургічным годзе ёсць толькі тры святы нараджэння: Езуса Хрыста, Панны Марыі і святога Яна Хрысціцеля — папярэдніка Езуса, які павінен быў падрыхтаваць Яму дарогу.
«Гэты факт гаворыць аб выключным значэнні святога Яна ў гісторыі збаўлення», — падкрэсліў арцыпастыр. Ён заўважыў, што Ян Хрысціцель стаў пасярэднікам паміж людзьмі і Езусам, паказаўшы ім Яго як Баранка, які бярэ на сябе грахі свету. Разам з тым, зазначыў арцыбіскуп, «Ян Хрысціцель супрацьстаяў грахоўным тэндэнцыям свайго часу і быў сумленнем сваёй эпохі, заклікаючы людзей да пакаяння».
На заканчэнне гаміліі арцыбіскуп Тадэвуш Кандрусевіч заклікаў вернікаў па прыкладу святога Яна Хрысціцеля быць голасам хрысціянства ў сучаснай пустыні духоўнага крызісу, што вядзе да безнадзейнасці.
Пасля Імшы перад выстаўленым Найсвяцейшым Сакрамэнтам адбылося прысвячэнне парафіі ў Снове Найсвяцейшаму Сэрцу Езуса.
