З 22 па 23 красавіка ў горадзе Баранавічы ў доме ксяндзоў вербістаў адбылася сустрэча кансэкраваных асобаў ва ўзросце да 40 гадоў з усёй Беларусі.
Падобная сустрэча адбываецца ўжо не першы раз, і яе мэтай з’яўляецца інтэграцыя маладых манаскіх асобаў Беларусі.
У гэтым годзе сустрэча праходзіла пад назвай: «Паслухмяныя волі Божай».
Арганізатарамі сёлетняй сустрэчы былі салезіяне і салезіянкі.
У першы дзень маладыя кансэкраваныя асобы мелі магчымасць пазнаёміцца і інтэгравацца праз супольныя гульні. Пасля інтэграцыі адбылася святая Імша, падчас якой ксёндз Павел Лемех OMI прамовіў да сабраных гамілію.
Пасля абеду законнікаў чакалі майстар-класы.
Падчас аднаго з іх ілюзіяніст Эрнэст Літвіновіч падзяліўся з сабранымі прыёмамі, якія дапамагаюць канцэнтраваць увагу гледачоў і слухачоў, а таксама распавёў пра памылкамі, якія робяць вядучыя і лектары, выступаючы перад аўдыторыяй. Радасным момантам была прэзентацыя аўтарскіх фокусаў ілюзіяніста.
Падчас другога майстр-класа сястра Паўла Бобер MSF, якая з’яўляецца таксама псіхолагам, закранула тэму манаскай паслухмянасці, што, паводле законніцы, павінна ствараць асабовасць, а не знішчаць яе. На заканчэнне дня быў вясёлы вечар, падчас якога манахі ўдзельнічалі ў «мазгабойні» і мелі магчымасць праверыць свае веды і эрудыцыю. Пытанні для «мазгабойні» падрыхтавала моладзь з салезіянскага араторыя.
Другі дзень распачаўся ранішняй адарацыяй Найсвяцейшага Сакрамэнту і Эўхарыстыяй, падчас якой гамілію прамовіў ксёндз Павел Федаровіч MIC. Пасля супольнай «манаскай кавы» ўдзельнікі палухалі канферэнцыю на тэму «Языком малюся і прапаведую волю Божую», якую падрыхтаваў ксёндз Павел Рудзьман.
Пасля інтэлектуальнага і духоўнага пасілку кансэкраваных асобаў чакаў пасілак добрых эмоцый.
Удзельнікі мелі магчымасць атрымаць зарад пазітыву ў кантактым заапарку, дзе было шмат прыгожых жывёл і птушак.
