6 красавіка ў Хрысціянскім сацыяльным цэнтры Місіі Добрага Самараніна ў Мінску адбылася малітва праслаўлення пад назвай «Дзеці нясуць міласэрнасць». Як і кожны год, усе прысутныя маліліся ў інтэнцыі абароны жыцця і супакою ў свеце.
У малітве ўдзельнічала адзінаццаць гуртоў Гомеля, Жодзіна, Івянца, Мазыра, Слуцка, Смалявічаў, Стоўбцаў, гурт Грэка-Каталіцкай Царквы, дзеці Місіі, калектывы з мінскіх парафій святога Яна Евангеліста і святога Францішка.
Дзеткі дзякавалі Богу за дар жыцця і за ласкі, якія атрымліваюць кожны дзень.
Сімвалам сустрэчы было сэрца. Кожнае дзіця прывезла сэрца, зробленае сваімі рукамі. А перад сцэнай былі ўсталяваныя два вялікія сэрцы; на адно з іх дзеці прымацоўвалі сем галоўных грахоў, а на другое — плады Духа Святога. Маоыя вернікі разважалі, якім павінна быць сэрца хрысціяніна.
Напрыканцы мерапрыемства дзеці ў працэсіі спусціліся ў капліцу Місіі і там пакінулі свае «сэрцы», а таксама памаліліся за сваю Радзіму.
На малітве быў прысутны Мітрапаліт Мінска-Магілёўскі арцыбіскуп Юзаф Станеўскі. Пасля кожнага выступу арцыпастыр уручаў удзельнікам памяткі сустрэчы, а напрканцы прамовіў да дзяцей слова.
Пасля малітвы праслаўлення адбыліся майстар-класы на наступныя тэмы: «Дэфіле і фотапазіраванне», «Птушкі з паперы», «Лайф лупінг — адчуй сябе дыджэем» і «Народныя танцы».
За ўдзел у майстар-класах кожны атрымаў падарунак.
