12 сакавіка біскуп Віцебскі Алег Буткевіч уключыў у склад Віцебскага катэдральнага капітула шэраг святароў Віцебскай дыяцэзіі, надаўшы ім тытул канонікаў.
Урачыстая цырымонія з гэтай нагоды адбылася ў катэдральным касцёле Езуса Міласэрнага ў Віцебску.
Як паведамляецца на сайце Catholicnews.by, у сваім звароце да сабраных у галоўнай святыні дыяцэзіі святароў біскуп Буткевіч нагадаў, што Віцебскі капітул з’яўляецца найстарэйшым з тых, якія былі заснаваныя ў сучаснай гісторыі Касцёла на Беларусі. Амаль праз два гады пасля ўстанаўлення Віцебскай дыяцэзіі па просьбе тагачаснага біскупа Віцебскага Уладзіслава Бліна Апостальская Сталіца ўстанавіла Віцебскі катэдральны капітул. Адбылося гэта 2 сакавіка 2001 года.
З таго часу мінула амаль чвэрць стагоддзя, і персанальны склад канонікаў капітула істотна змяніўся.
Некаторыя з іх, а менавіта ксёндз Юзаф Булька, ксёндз Уладзіслаў Пятрайціс, ксёндз Міхал Юзвяк адышлі з гэтага свету.
З нагоды юбілею 25-годдзя з часу заснавання Віцебскай дыяцэзіі біскуп Буткевіч увёў у склад капітула новых святароў:
- ксёндз Аляксей Ляшко — грэміяльны канонік, дэкан і пэнітэнцыярый капітула
- ксёндз доктар Валерый Марціноўскі — грэміяльны канонік, сакратар капітула;
- ксёндз Аляксей Асон — ганаровы канонік;
- ксёндз Марат Казлоўскі — ганаровы канонік;
- ксёндз Эдвард Нарадоўскі — ганаровы канонік;
- ксёндз Павел Самсонаў — ганаровы канонік;
- ксёндз доктар Мікалай Ціхановіч — ганаровы канонік;
- ксёндз доктар Сяргей Сурыновіч — ганаровы канонік.
Ксёндз канонік Віктар Місевіч быў прызначаны прэпазітам (старшынёй) капітула.
Капітул — гэта калегія святароў, заданнем якой з’яўляецца здзяйсненне больш урачыстых літургічных дзеянняў у катэдральным касцёле, а таксама выкананне заданняў, даручаных яму правам або дыяцэзіяльным біскупам.
Новыя канонікі Віцебскага катэдральнага капітула ў прысутнасці біскупа вызналі веру і прынеслі прысягу вернасці Касцёлу.
