З 15 па 17 снежня каталіцкія скаўты развозілі Бэтлеемскае сввятло міру па парафіях Беларусі.
Як паведамляе парафіяльны сайцт Jan.by, у пятніцу раніцай прадстаўнікі скаўцкага руху прысутнічалі падчас унясення Бэтлеемскага агню ў гродзенскую катэдру і падчас шляху дадому падзяліліся гэтым святлом са скаўцкай супольнасцю Івянца. Увечары ўсе скаўцкія адзінкі Мінска ўнеслі Бэтлеемскі агонь у архікатэдральны касцёл Найсвяцейшага Імя Марыі.
Яго сустрэў Мітрапаліт Мінска-Магілёўскі арцыбіскуп Юзаф Станеўскі.
У суботу скаўцкія коп’і (адзінкі арганізацыі), а таксама кола маладых вандроўнікаў і вогнішча маладых правадніц выехалі на свае маршруты па Беларусі. Разам яны праехалі больш за 4 тысячы кіламетраў, наведаўшы ўсе дыяцэзіі Беларусі.
Падчас свайго шляху кап’ё «Ваўчыца», між іншым, перадало агонь жодзінскай зграі «Ваўчанят», а кап’ё «Арол» — полацкім коп’ям «Рысь» і «Ластаўка».
У нядзелю Бэтлеемскі агонь скаўты даставілі ў парафіі мінскіх дэканатаў.
