16 лістапада, ва ўрачыстасць Найсвяцейшай Панны Марыі, Маці Міласэрнасці (Вастрабрамскай), у катэдральнай базыліцы святога Францішка Ксавэрыя адбылася святая Імша, цэлебрыцыю якой узначаліў біскуп Гродзенскі Аляксандр Кашкевіч.
Як паведамляе Прэс-служба Гродзенскай дыяцэзіі, у 1991 годзе, з моманту заснавання Гродзенскай дыяцэзіі, Маці Божая Вастрабрамская была абрана яе галоўнай Апякункай.
Ва ўрачыстасць у катэдральнай святыні разам з мясцовымі парафіянамі маліліся шматлікія вернікі горада, а таксама студэнты Вышэйшай духоўнай семінарыі ў Гродне.
У гаміліі біскуп Кашкевіч засяродзіў увагу на Маці Божай Міласэрнай, якая першай з людзей спазнала ўсемагутнасць і бязмернасць Божай Міласэрнасці.
Па словах іерарха, гэтая ўрачыстасць — нагода падзякаваць Пану Богу за тое, што Ён у сваім Провідзе даў людзям Найсвяцейшую Панну Марыю як Маці і Заступніцу, чыя славутая ласкамі выява ў Вострай Браме ўжо больш за трыста гадоў прыцягвае незлічоную колькасць пілігрымаў.
«Трэба памятаць, што Марыя прыходзіць да нас са сваёй матчынай дапамогай не толькі ў санктуарыях. Каб сустрэцца з Ёй на малітве, мы не мусім нікуды пілігрымаваць»,
— падкрэсліў біскуп, дадаўшы, што «Яна з намі тут і цяпер, у кожны момант нашага жыцця».
Пастыр Касцёла на Гродзеншчыне адзначыў, што Панна Марыя як сапраўдная Маці радуецца, калі да Яе прыходзяць, і ніколі не адмаўляе ў сваёй дапамозе.
Біскуп Ккашкевіч заахвоціў удзельнікаў Літургіі прасіць у Маці Божай Вастрабрамскай, каб Яна вымаліла для іх ласку моцнай веры і любові да Хрыста.
Падчас Эўхарыстыі ўсе прысутныя асаблівым чынам маліліся за тых, хто ўтварае сям’ю Гродзенскай дыяцэзіі, — за духавенства і вернікаў.
