1 лістапада ў парафіі святога Казіміра ў Стоўбцах (Мінска-Магілёўская архідыяцэзія) адбыўся Баль Усіх Святых для дзяцей.
Ва ўрачысты дзень пробашч парафіі ксёндз канонік Ігар Лашук і «каралевіч Казімір» з радасцю сустракалі «анёлаў» і «святых» у касцёле. Пасля малітвы ксёндз Ігар благаславіў усіх і запрасіў на свята.
Баль распачаўся паланезам, які, напэўна, танцаваў калісьці і сапраўдны каралевіч Казімір, апякун стаўбцоўскай парафіі. Гоман, танцы, шчаслівыя ўсмешкі, вясёлыя гульні. Больш за пяцьдзясят хлопчыкаў і дзяўчынак з увагай і цікавасцю слухалі аповед парафіяльнай катэхеткі сястры Наталлі пра жыхароў неба — святых.
«Слухайцеся бацькоў, добра вучыцеся, любіце адзін аднаго, і наблізіцеся да Хрыста, і пойдзеце шляхам святасці», — такі заклік з вуснаў сястры Наталлі не раз гучаў падчас балю Усіх Святых. Удзельнікі танчылі разам з каралевічам Казімірам і святой Кацярынай, дзяліліся на каманды для гульні ў мяч. Нават дарослым было цікава і весела.
Баль суправаджаўся пачастункам пры шчодра накрытым салодкім стале. Прысмакі для яго рыхтавалі і бацькі, і валанцёры парафіяльнай суполкі Дабрачыннага каталіцкага таварыства Caritas, якая ўжо год дзейнічае ў Стоўбцах і ўзяла на сябе клопат па ўпрыгожанні залы і забеспячэнні пачастункаў для дзяцей. Кампот, сокі, выпечка, розныя слодычы: дзеці ахвотна стараліся ўсё пакаштаваць.
Не абышлося і без конкурсу касцюмаў.
Каралевіч Казімір і святая Кацярына прызналі самымі прыгожымі касцюмы Панны Марыі, святога Майсея і анёла.
Усе тры ўдзельнікі за сваё ўбранне атрымалі ўзнагароды — прыгожыя карціны з выявай роднага парафіяльнага касцёла, якія стварыла мясцовая валанцёрка Святлана Канашэнка. Валанцёры паклапаціліся і пра тое, каб ніхто з удзельнікаў не застаўся пакрыўджаным: усе дзеці атрымалі па шакаладцы.
На заканчэнне было зроблена сумеснае фота з «каралеўскай асобай» — апекуном парафіі святым Казімірам, які сваёй дабрачыннасцю заслужыў павагу сярод людзей і дасягнуў святасці.
Арганізатарам парафіяльнага мерапрыемства для дзяцей хочацца верыць, што юныя ўдзельнікі балю зразумелі, што кожны можа быць святым: трэба толькі любіць Бога і бліжняга.
