28 верасня ў катэдральным касцёле Найсвяцейшага Імя Марыі ў Мінску адбылося благаслаўленне студэнтаў на новы навучальны год.
Цэлебрацыю святой Імшы ўзначаліў ксёндз Уладзімір Марушэўскі.
У цудоўнай атмасферы супольнай малітвы каталіцкая моладзь узнесла хвалу Пану Богу, а таксама прынесла дары: вінаград, заліковыя кніжкі, падарункі для першакурснікаў, хлеб і алей.
У гаміліі адказны за душпастырства моладзі ў Мінска-Магілёўскай архідыяцэхіі ксёндз Андрэй Бурак звярнуў увагу на важнасць і неабходнасць таго, каб моладзь брала ўдзел у жыцці Касцёла і не баялася праяўляць ініцыятыву:
«Сення мы сабраліся не толькі благаславіць залікоўкі і памаліцца, але прывітаць і сустрэць усіх тых, хто шукае супольнасць, хто толькі прыехаў у Мінск з іншых гарадоў і мясцін, каб будаваць разам месца, у якім можам узрастаць і дзяліцца радасцю адно з адным»,
— сказаў святар.
Напрыканцы Літургіі адбылося благаслаўленне заліковак, а таксама індывідуальнае благаслаўленне на навучальны год.
Сустрэча моладзі працягнулася ў дольным касцёле, дзе удзельнікаў чакала цікавая забаўляльная праграма з віктарынай, гульнямі, танцамі і конкурсамі. Першакурснікі маглі пазнаёміцца з прадстаўнікамі розных супольнасцяў Мінска і знайсці для сябе тую, якая бліжэй да сэрца. У гэтым годзе 29 маладых людзей атрымалі запрашэнне на сустрэчы, дзе яны змогуць трапіць у атачэнне вернікаў і знайсці сабе сяброў сярод іх.
Дэвіз сустрэчы: «Прыйдзіце да Мяне, усе».
Мерапрыемства скончылася малітвай, смачнай гарбатай з печывам і вясёлымі танцамі.
