20 верасня ў межах праекту «Дыялог культур і рэлігій» студэнты Беларускага дзяржаўнага ўніверсітэта наведалі касцёл Маці Божай Будслаўскай у Мінску (Мінска-Магілёўская архідыяцэзія).
Гутарку са студэнтамі вядучай беларускай ВНУ правёў пробашч парафіі ксёндз канонік Францішак Рудзь.
Святар расказаў моладзі пра гісторыю Каталіцкага Касцёла на тэрыторыі Беларусі, пазнаёміў са шматвяковымі традыцыямі талерантнасці, добрасуседства і адзінства паміж рознымі канфесіямі на беларускіх землях.
Студэнты даведаліся пра традыцыі напісання ікон і алтарных карцін, пазнаёміліся з гісторыяй фарміравання Марыйнага санктуарыя ў Будславе і значнасцю фэсту ў гонар абраза Маці Божай Будслаўскай, які быў унесены ў рэпрэзентацыйны спіс нематэрыяльнай культурнай спадчыны ЮНЕСКА.
