У суботу 9 верасня ў парафіі Нараджэння Найсвяцейшай Панны Марыі ў Гомелі (Пінская дыяцэзія) адзначылі адпустовую ўрачыстасць.
На сёлетнюю ўрачыстасць сабраліся шматлікія парафіяне, святары і кансэкраваныя асобы, якія нясуць служэнне на Гомельшчыне. Цэлебрацыю святой Імшы ўзначаліў ксёндз Юрый Варанко, былы пробашч парафіі, які сёння з’яўляецца душпастырам каталіцкай супольнасці ў Мазыры. Запрошаны новапрэзбітэр айцец Сяргей Калюта з манаскага ордэна святога Паўла, першага пустэльніка, прамовіў святочную гамілію.
Пасля заканчэння святой Імшы адбылася Эўхарыстычная працэсія вакол касцёла. Вернікі прасілі Божага благаслаўлення ў жыцці праз заступніцтва Найсвяцейшай Панны Марыі.
Ужо склалася традыцыя працягваць святкаванне ўвечары каля касцёла, каб разам услаўляць Бога песнямі і танцамі.
Гомельскі касцёл вядомы фрэскавымі роспісамі на тэму Нараджэння Найсвяцейшай Панны Марыі, выкананымі італьянскімі майстрамі Фабіё Нонэсам і яго сына Ісмаэлем. Фрэскі, які прадстаўляюць прыйсце ў свет Багародзіцы, упрыгожваюць алтарную частку касцёла — першай каталіцкай святыні, пабудаванай у Гомелі пасля часоў атэістычнага пераследу.
