7 верасня, у першы чацвер месяца, у катэдральным касцёле Найсвяцейшага Імя Марыі ў Мінску Мітрапаліт Мінска-Мапгілёўскі арцыбіскуп Юзаф Станеўскі ўзначаліў цэлебрацыю святой Імшы, падчас якой разам з вернікамі маліўся аб пакліканнях да Божай службы.
У супольнай малітве ўдзельнічала моладзь сталічнай катэдральнай парафіі.
Звяртаючыся да прысутных, арцыпастыр перадусім адзначыў, што справа пакліканняў заўсёды знаходзіцца ў цэнтры ўвагі Касцёла.
Пры гэтым іерарх заўважыў, што цяпер малітва ў гэтай інтэнцыі асабліва актуальная.
Па словах арцыбіскупа, малітвай аб пакліканнях сеецца слова, як азімыя, каб яно прынесла плён пасля зімы, якую цяпер перажывае мясцовы Касцёл: сёлета з Мінска-Магілёўскай архідыяцэзіі ніхто не пайшоў у семінарыю.
«Будзем жа маліцца, згодна з загадам Хрыста з Евангелля: „закіньце яшчэ раз сеткі“.
Тады, калі нам здаецца, што няма адважных да службы Божай, Езус кажа: „Маліцеся і не пераставайце“, „Прасіце Гаспадара жніва, каб паслаў работнікаў на жніво сваё“. Бог задбае, паклапоціцца пра пакліканні. Як Пётр, які даверыўся Езусу: хоць „мы ўжо лавілі і нічога не злавілі“, аднак зноў закінем сеткі паводле слова Хрыста», — заахвоціў арцыбіскуп Станеўскі да малітвы.
Арцыпастыр падкрэсліў, што маліцца аб пакліканнях павінны і святары, і ўсе вернікі, а асабліва моладзь.
«Просім Хрыста, каб прайшоў і па нашым беразе; каб моцай свайго слова паклікаў за сабою тых, хто будзе працягваць Яго місію ў Касцёле на Беларусі», — сказаў на заканчэнне арцыбіскуп Юзаф Станеўскі.
