Віншаванне
на ўрачыстасць Нараджэння Пана
біскупа Пінскага Антонія Дзям’янкі

І пайшлі яны, спяшаючыся,
і знайшлі Марыю і Юзафа,
і Немаўля, якое ляжала ў яслях

(Лк 2, 16)

Умілаваныя ў Хрысце браты і сёстры, дарагія вернікі і людзі добрай волі!

З нагоды надыходзячых урачыстасцяў Божага Нараджэння звяртаюся да вас са словамі калядных віншаванняў.

Святочныя дні Божага Нараджэння з’яўляюцца для ўсіх нас радаснай магчымасцю яшчэ раз заглыбіцца ў таямніцу прыходу ў гэты свет Божага Сына, перажыць асаблівую атмасферу сустрэчы з Нованароджаным Хрыстом, Яго Найсвяцейшай Маці і Святым Юзафам, а таксама з усімі тымі, хто вітаў на зямлі Слова, якое сталася Целам (гл. Ян 1, 14).

Сёлетнія святы Божага Нарадждэння ў нашым рэгіёне мы перажываем у духу падрыхтоўкі да радаснага юбілею 100-й гадавіны з часу заснавання Папам Піем ХІ Пінскай дыяцэзіі, які будзем адзначаць у 2025 годзе. Хочам гэты новы літургічны перыяд перажыць як Год хрысціянскай надзеі, молячыся аб шчаслівай будучыні для ўсіх нас.

Схіляючыся перад таямніцай Божага Нараджэння, жадаю ўсім вам непаўторнай цеплыні сямейнай атмасферы калядных святаў. Няхай нованароджаны Збавіцель свету напоўніць кожны дом і кожнае сэрца верай, надзеяй і любоўю. Жадаю моцнага духоўнага і фізічнага здароўя, Божай апекі ва ўсіх справах, спакойных, благаслаўлёных калядных святаў і шчаслівага Новага Года.

Хрыстус Нарадзіўся! — Славім Яго!

✠Антоні Дзям’янка
Біскуп Пінскі

Пінск, Божае Нараджэнне 2022 года