У сераду 23 лістапада ў старадаўняй катэдры Унебаўзяцця Найсвяцейшай Панны Марыі і святога Станіслава ў Магілёве адбылася чарговая сустрэча духавенства Магілёўскага і Бабруйскага дэканатаў.
На сустрэчы прысутнічалі Мітрапаліт Мінска-Магілёўскі арцыбіскуп Юзаф Станеўскі, Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB, святары, а таксама законнікі і законніцы, якія служаць на тэрыторыі дэканатаў Магілёўскага рэгіёна.
Сустрэча распачалася малітвай Літургіі Гадзінаў, пасля чаго ў межах пастаяннай фармацыі духавенства ксёндз канонік Андрэй Далянскі прамовіў духоўна-аскетычную канферэнцыю.
У ёй духоўны айцец адзначыў, што месяц лістапад, які традыцыйна з’яўляецца часам асаблівай малітвы за памерлых і наведвання могілак, схіляе засяродзіць увагу таксама на ўласнай душы, глыбей задумацца на жыццём, яго сэнсам і над смерцю.
Акрамя таго, ксёндз Андрэй Далянскі звярнуў увагу на захаванне цішыні (маўчання) як элемент падрыхтоўкі да святой Імшы, што неабходна для належнага засяроджання, і на момант падзякі пасля Эўхарыстыі — асабістую адарацыю Найсвяцейшага Сакрамэнту.
Пасля канферэнцыі адбылося выстаўленне і адарацыя Найсвяцейшага Сакрамэнту, падчас якой ахвотныя маглі скарыстацца з сакрамэнту пакаяння.
Кульмінацыяй сустрэчы стала святая Імша, якую канцэлебравалі ўсе прысутныя святары. Узначаліў цэлебрацыю арцыбіскуп Станеўскі, які маліўся ў інтэнцыі спачылага духавенства Магілёўшчыны. У прамоўленай гаміліі іерарх зазначыў, што ў цяперашні час адбываецца змена эпох, таму неабходна ўмець бачыць перспектыву, да якой трэба імкнуцца. Арцыпастыр падкрэсліў нязменную важнасць малітвы, асабліва ў час, які цяпер даводзіцца перажываць.
«Праз малітву мы становімся бліжэй да Езуса Укрыжаванага, што дае нам сілу не баяцца, чаго ад нас патрабуюць таксама дадзеныя ў свой час святарскія абяцанні і манаскія шлюбы», — падкрэсліў іерарх.
Заключным пунктам сустрэчы духавенства і кансэкраваных асоб Магілёўшчыны была арганізацыйная частка, падчас якой арцыбіскуп Юзаф Станеўскі напачатку падзякаваў усім за службу і малітву, пасля чаго звярнуўся з просьбай нанава ажывіць у сабе дух паклікання, «каб разумець, што святарства мы прынялі не толькі для сябе, але і для тых, сярод каго служым», і нагадаў аб пастырскім падыходзе да людзей, а таксама пра адказнасць за словы, якія прамаўляюцца падчас казанняў.
Пасля арцыбіскупа прамовіў біскуп Яшэўскі. Генеральны вікарый архідыяцэзіі, адказны за Магілёўскі рэгіён, між іншым, паінфармаваў духавенства і кансэкраваных асоб Магілёўшчыны пра тое, што падрыхтаваны пераклад на беларускую мову Кодэкса кананічнага права, паводле якога больш не ўжываецца ранейшы тэрмін «распарадчык сакрамэнтаў», а «служыцель сакрамэнтаў».
