9 лістапада ў архікатэры Найсвяцейшага Імя Марыі ў Мінску адбылася малітва за спачылае духавенства Мінска-Магілёўскай архідыяцэзіі.
Такія малітвы ў лістападзе ўжо сталі добрай традыцыяй.
На пачатку святой Імшы былі прачытаныя імены біскупаў і святароў, якія служылі ў гістарычных Мінскай і Магілёўскай дыяцэзіях; узгадалі таксама прадстаўнікоў духавенства, якія адыйшлі ў вечнасць у ХХ і ХІ стагодзях.
Цэлебрацыю ўзначаліў Мітрапаліт Мінска-Магілёўскі арцыбіскуп Юзаф Станеўскі. Разам з ім маліліся арцыбіскуп эмэрыт Тадэвуш Кандрусевіч, асабісты сакратар арцыбіскупа Станеўскага ксёндз Юрый Ясевіч, ксяндзы канонікі Мінскага катэдральнага капітулу, а таксама вернікі.
У прамоўленай гаміліі арцыбіскуп Станеўскі звярнуў увагу на важнасць малітвы за памерлых, у тым ліку за спачылае духавенства, якое праз стагодзі дапамагала ўзрастаць і захоўваць веру, перадаваць яе нашчадкам.
Іерарх узгадаў пра біскупаў і святараў, якія залічаныя да ліку святых і благаслаўленых, заахвочваючы да малітвы праз іх заступніцтва.
