Увечары 1 лістапада, ва ўрачыстасць Усіх святых, Мітрапаліт Мінска-Магілёўскі арцыбіскуп Юзаф Станеўскі ўзначаліў цэлебрацыю святой Імшы ў катэдральным касцёле Найсвяцейшага Імя Марыі ў Мінску.
У гэты дзень Касцёл адначасова ўшаноўвае ўсіх святых — як вядомых, так і тых, значна больш шматлікіх, якія Касцёлам не былі абвешчаны святымі, але дасягнулі хвалы збаўленых у Божым Валадарстве. Арцыпастыр заахвоціў вернікаў наследаваць прыклад святых у штодзённым жыцці, каб самім дасягнуць святасці.
Пасля Імшы ў галоўнай святыні Мінска-Магілёўскай архідыяцэзіі адбылося набажэнства за памерлых.
На чале з арцыбіскупам Станеўскім прысутныя вернікі ўзнеслі малітвы за спачылых, як гэта звычайна адбываецца на могілках ва ўспамін Усіх памерлых вернікаў, што адзначаецца ў Касцёле 2 лістапада.
Падчас пяці прыпынкаў яны маліліся, у прыватнасці, за спачылае духавенства, за ахвяраў войнаў і ўсіх палеглых, за памерлых бацькоў, дабрадзеяў і выхаваўцаў.
