Пошук

31.10.2022 22:22   Тэкст: а. Раман Шульц ОР / Фота: Таццяна Дуенкава / Catholic.by

У нядзелю 30 кастрычніка ў парафіі святога Казіміра і святой Ядзвігі ў Магілёве Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB здзейсніў урачыстае ўнясенне рэліквій айцоў францішканаў, мучанікаў Другой сусветнай вайны.

Айцец Ахілес Пухала і айцец Герман Стэмпень у ліпені 1943 года сваёю ахвяраю выратавалі каля 300 парафіянаў, асуджаных на смерць карнікамі, але самі былі закатаваныя.

Яны прынялі мучаніцкую смерць у Баравікоўшчыне, што каля Івянца. Айцец Герман меў 33 гады, а айцец Ахілес — 32.

У 1999 годзе разам з іншымі мучанікамі Другой сусветнай вайны яны былі далучаныя да ліку благаслаўлёных Каталіцкага Касцёла.

У старым рэлікварыі, часткова пашкоджаным у пажары, была змешчана капсула з маленькімі часцінкамі костак чарапоў мучанікаў.

Вернікі магілёўскай парафіі, служэнне ў якой нясуць айцы дамінікане, праз заступніцтва мучанікаў, што працавалі і аддалі жыццё за сваіх парафіянаў на тэрыторыі Беларусі, будуць маліцца аб вернасці і руплівасці для святароў і аб новых святарскіх і манаскіх пакліканнях.

Адбылося таксама благаслаўленне новай фігуры святога Міхала Арханёла, галоўнага апекуна Касцёла ў Беларусі.

Падчас святой Імшы біскуп Яшэўскі прамовіў гамілію, у якой, грунтуючыся на евангелскім урыўку пра сустрэчу Езуса з мытнікам Закхеем, звярнуў увагу на неабходнасць навяртання сэрца. «Грэшнік Закхей, ідучы за прагненнем свайго сэрца, атрымаў вялікую ласку сустрэчы з Езусам, які ўвайшоў не толькі ў ягоны дом, але перш за ўсё ў яго душу, выклікаўшы радыкальную перамену ў яго жыцці», — зазначыў іерарх.

Пасля святой Імшы біскуп благаславіў рэплікі чатырох сярэднявечных гульняў, выкананыя паводле старадаўніх узораў цесляром з ваколіц Навагрудка.

Душпастыры магілёўскай парфіі святога Казіміра і святой Ядзвігі і іх вернікі спадзяюцца, што гэтыя гульні будуць служыць не толькі дзецям і падлеткам, ствараючы супольнасць і здаровае спаборніцтва паміж імі, але і створаць моманты радасці для дарослых.

 

Абноўлена 31.10.2022 23:04
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа