З 25 верасня па 2 кастрычніка ўпершыню ў гісторыі парафіі святога Юзафа ў Брэсце (Пінская дыяцэзія) праходзілі святыя місіі — час асаблівай ласкі, прапаведвання Добрай Навіны, навяртання і духоўнага аднаўлення вернікаў.
Па запрашэнні пробашча гэтай маладой брэсцкай парафіі ксяндза Антонія Гея святыя місіі правялі святары з законніцкай супольнасці Місіянераў Аблатаў Беззаганнай Марыі: ксёндз Анджэй Юхневіч ОМІ і ксёндз Павел Лемех ОМІ.
Падчас святых місій вернікі слухалі слова Божае. Ад нядзелі да серады гучаў пакаянны звон, які заклікаў да навяртання і перамены жыцця ўсіх тых, хто яго чуў. Парафіяне, разважаючы пра таямніцу смерці і вечнага жыцця маліліся за сваіх блізкіх памерлых і за сябе.
Хворыя і састарэлыя мелі магчымасць разам сустрэцца на святой Імшы, паслухаць Божае слова і прыняць святыя сакрамэнты.
Парафіяне разам з місіянерамі праслаўлялі Хрыста прысутнага ў Найсвяцейшым Сакрамэнце.
У пятніцу ў духу ўміласціўлення ўдзельнікі місій перапрашалі Бога за ўсе грахі: свае ўласныя і ўсяго свету.
У гэты дзень пасля ўрачыстага набажэнства адбылося ўсталяванне і благаслаўленне місійнага крыжа.
У суботу пробашч разам з парафіянамі даручылі ўсю парафію Беззаганнай Марыі, Маці Бога і нашай нябеснай Матулі. Многія вернікі скарысталіся з сакрамэнту паяднання.
У нядзелю 2 кастрыніка адбылося ўрачыстае заканчэнне святых місій.
Вернікі, якія бралі ў іх удзел, атрымалі поўны адпуст.
Яны сабраліся каля місійнага крыжа, каб ушанаваць яго і падзякаваць Богу за духоўную перамогу Божай ласкі ў чалавечых сэрцах.
