У суботу 30 ліпеня ксёндз прэлат Антоній Гей, найстарэйшы пасля біскупа Казіміра Велікасельца духоўны Пінскай дыяцэзіі, адзначаў 75-годдзе з дня нараджэння і 44-ю гадавіну святарства.
Шматлікія вернікі парафіі святога Юзафа ў Брэсце сабраліся разам, каб у супольнай малітве дзякаваць Богу за свайго пробашча, ксяндза Антонія, і прасіць шчодрых Божых ласкаў для свайго шматгадовага душпастыра.
Кульмінацыяй свята стаў удзел усіх сабраных у святой Імшы, на якую прыбылі святары з розных парафій Пінскай дыяцэзіі. На пачатку Эўхарыстыі, цэлебрацыю якой узначаліў сам юбіляр, ён прывітаў усіх удзельнікаў і выказаў словы падзякі Богу за дар жыцця, веры і паклікання.
Ксёнз прэлат падкрэсліў, што святарскае служэнне робіць яго шчаслівым, і заахвоціў сабраных разам з ім дзякаваць Богу і маліцца за яго, каб мог да канца выканаць Божую волю.
Ксёндз Антоній зазначыў, што, нягледзячы на ўзрост, неабходна пастаянна развівацца духоўна, яшчэ больш адкрываць каштоўнасць святарства і вучыцца прыслухоўвацца да меркавання маладых сабратоў. Ён дадаў, што дары і ласкі, якімі надзелены святар, незлічоныя.
Гамілію падчас Эўхарыстыі прамовіў ксёндз Януш Чарнамораў, пробашч парафіі ў Нароўлі.
У Божым слове ён разважаў над першасвятарскай малітвай Езуса, у якой асабліва яскрава выяўляецца веліч святарства.
Між іншым, ксёндз Януш звярнуў увагу на пазнанне Бога, сяброўства з Езусам, удзел святара ў славе Хрыста. Ён таксама адзначыў заданне сведчання пра Бога Айца, які так моцна палюбіў свет; пра Сына, які заклікае да навяртання і слабых людзей робіць сваімі сябрамі; і пра Духа Святога, на натхненні якога неабходна быць пастаянна адкрытымі дзеля будавання жывой супольнасі Касцёла.
На заканчэнне Імшы гучалі словы падзякі і віншавання ад дзяцей, моладзі, сем’яў і асобаў старэйшага ўзросту.
Вернікі дзякавалі Богу за свайго пробашча і жадалі яму, нягледзячы на ўзрост, яшчэ доўгіх гадоў служэння ў моцным здароўі на Божую хвалу.
Канцлер дыяцэзіяльнай Курыі ксёндз Андрэй Рылка перадаў юбіляру віншаванні ад біскупа Пінскага Антонія Дзям’янкі.
