29 ліпеня, ва ўспамін святых Марыі, Марты і Лазара, Мітрапаліт Мінска-Магілёўскі арцыбіскуп Юзаф Станеўскі наведаў маладую каталіцкую супольнасць горада Мінска.
Парафія, якая знаходзіцца ў мікрараёне Уручча, што на ўсходзе беларускай сталіцы, мае тытул святога апостала Андрэя і святога Леапольда Багдана Мандзіча. Служэнне ў ёй нясуць палатыны — святары з Таварыства каталіцкага апостальства, заснаванага ў ХІХ стагоддзі святым Вінцэнтам Палоцці.
Цяпер вернікі парафіі разам са сваімі душпастырамі вядуць будаўніцтва парафіяльнага касцёла і пакуль што моляцца ў невялікай капліцы.
Мэта візіту арцыпастыра — пазнаёміцца з ходам будаўніцтва касцёла, на якім этапе яно знаходзіцца, і якія ёсць планы і перспектывы на будучыню, але таксама — што немалаважна — перадусім пазнаёміцца са «святыняй» пабудаванай з жывых «камянёў» — з мясцовымі парафянамі.
Адзін з душпастыраў, якія нясуць служэнне ў парафіі, ксёндз Яўген Эйсмант SAC паказаў арцыбіскупу Станеўскаму будоўлю, расказаў іерарху аб планах на будучыню і аб тым, якія цяжкасці даводзіцца пераадольваць.
Кульмінацыяй візіту стала супольная малітва з вернікамі парафіі ва Уруччы. Арцыбіскуп Юзаф Станеўскі ўзначаліў для іх цэлебрацыю святой Імшы, на якой дзякаваў Богу за дапамогу і апеку над парафіяй.
