21 ліпеня, у адзінаццатую гадавіну смерці кардынала Казіміра Свёнтка, Мітрапаліт Мінска-Магілёўскі арцыбіскуп Юзаф Станеўскі ўзначаліў цэлебрацыю святой Імшы за свайго спачылага папярэдніка ў мінскім катэдральным касцёле Найсвяцейшага Імя Марыі.
Разам з арцыпастырам маліліся блізкія супрацоўнікі кардынала: Генеральны вікарый Мінска-Магілёўскай архідыяцэзіі біскуп Юрый Касабуцкі, пробашч мінскай катэдральнай парафіі ксёндз канонік Антоній Клімантовіч, пробашч маладзечанскай парафіі святога Юзафа ксёндз прэлат Эдмунд-Даўгіловіч Навіцкі.
У Эўхарыстыі ў Мінску ўзялі ўдзел таксама пілігрымы з Мар’інай Горкі і Рудзенска на чале са сваім пробашчам ксяндзом Генрыхам Кучынскім, якія напярэдадні наведалі Пінск і месца пахавання кардынла Свёнтка.
У прамоўленай гаміліі біскуп Касабуцкі падкрэсліў вялікі ўнёсак спачылага іеарарха ў адраджэнне Касцёла на Беларусі пасля дзесяцігоддзяў атэістычных ганенняў на веру, першага і адзінага кардынала ў сучаснай гісторыі нашай краіны.
Да чарговай гадавіны смерці кардынала Свёнтка ў адрэстаўраванай яго намаганнямі мінскай катэдры адкрылася падрыхтаваная выдавецтвам Мінска-Магілёўскай архідыяцэзіі «Pro Christo» фотавыстава, прысвечаная жыццю і дзейнасці іерарха, які за надзвычайную мужнасць і вернасць Касцёлу сярод нялюдскіх выпрабаванняў быў уганараваны спецыяльнай узнагародай Fidei testis — «Сведка веры».
