У выдавецтве «Pro Christo» ўбачыла свет кніга сястры Анны Чайкоўскай WDC «Чысцец у зямным жыцці».
«Ці можа чалавек пазбегнуць кары за свае грахі? Не. Аднак ён можа прайсці праз ачышчэнне падчас зямнога жыцця, а не толькі пасля смерці», — зазначае аўтарка, якая з’яўляецца сузаснавальніцай супольнасці дапамогі душам чысцовым.
У кнізе распавядаецца пра духоўныя сродкі ачышчэння чалавечай душы ад граху і яго наступстваў.
Касцёл вучыць, што пасля смерці чалавечая душа, якая мае патрэбу ў ачышчэнні, праходзіць працэс перамены ў чысцы, аднак яшчэ ў зямным жыцці чалавек можа сфармаваць сваё сэрца паводле прыкладу і падабенства Божага Сэрца, каб у хвіліну смерці ўдзельнічаць у поўнай радасці дзяцей Божых. Аўтар паказвае, як душа можа дасягнуць гэтага праз святыя сакрамэнты, адпусты, адарацыю, слуханне Божага слова, прабачэнне, яднанне сваіх цярпенняў з мукаю Хрыста і праз шматлікія іншыя духоўныя практыкі.
У другой частцы кнігі змешчаны сведчанні тых, хто меў містычны досвед сустрэчы з душамі ў чысцы і распавёў пра гэта ў сваіх аўтабіяграфіях, дзённіках, успамінах.
Кнігу можна набыць па спецыяльным кошце падчас фэсту ў Будславе 1–2 ліпеня ў фірмовых намётах выдавецтва «Pro Christo».
