У нядзелю 24 красавіка, калі адзначалася свята Божай Міласэрнасці, арцыбіскуп эмерыт Тадэвуш Кандрусевіч цэлебраваў урачыстую святую Імшу ў парафіі Насвяцейшага Сэрца Езуса ў Крулеўшчыне (Докшыцкі дэканат, Віцебская дыяцэзія).
Увечары напярэдадні заслужаны іерарх маліўся з вернікамі суседняй парафіі Святой Сям’і i святога Юрыя ў Барсуках, дзе адзначаўся фэст у гонар святога апекуна.
У нядзельнай гаміліі ў Крулеўшчыне арцыбіскуп Кандрусевіч падкрэсліў, што таямніца Божай міласэрнасці ва ўсёй паўнаце праявілася ў пасхальнай таямніцы крыжовай смерці і Уваскрасення Езуса.
Іерарх дадаў, што яна праяўлецца таксама ў цэлебрацыі сакрамэнтаў, перадусім сакрамэнту пакаяння.
Арцыпастыр нагадаў вернікам аб аб’яўленнях Езуса Міласэрнага святой Фаўстыне Кавальскай, што адбываліся ў сярэдзіне 30-х гадоў мінулага стагоддзя.
«Наш зямляк, благаслаўлёны ксёндз Міхал Сапоцька, які быў спаведніком сястры Фаўстыны, папрасіў яе запісваць аб’яўленні. Такім чынам сціплая законніца стала „сакратаркай“ Божай Міласэрнасці, і чалавецтва атрымала яе „Дзённік“, які з’яўляецца крыніцай культу Божай Міласэрнасці», — заўважыў арцыбіскуп.
Ён нагадаў, што свята Божай міласэрнасці, якое адзначаецца ў Другую Велікодную нядзелю, устанавіў святы Ян Павел ІІ у 2000 годзе.
«Вялікі Папа казаў, што адзіная надзея сучаснага свету — у Божай Міласэрнасці. <…> Сучасны свет, які перажывае шмат трагедый, шукае леку ад іх. Такім лекам з’яўляецца Божая Міласэрнасць», — падкрэсліў іерарх.
Арцыбіскуп Тадэвуш Кандрусевіч пажадаў вернікам невялікай парафіі на ўскрайку Віцебскай дыяцэзіі даверыцца Божай Міласэрнасці дзеля хутчэйшага вырашэння надзённых праблем і будавання цывілізацыі жыцця і міру.
