Супольнасць місіянераў клярэтынаў на Беларусі і Курыя Гродзенскай дыяцэзіі са смуткам паведамляюць, што ўвечары 6 лютага на 79-м годзе жыцця адышоў у вечнасць ксёндз Пётр Марцінец CMF.
Ксёндз Пётр Марцінец CMF нарадзіўся 13 мая 1943 г. у Аполі (Польшча). У 1971 г. скончыў Папскую семінарыю ў Вроцлаве. Прэзбітэрскае пасвячэнне прыняў 29 чэрвеня 1972 г. у Аполі.
Спачылы амаль 50 гадоў пражыў у святарстве і значную частку гэтага часу прысвяціў пастырскаму служэнню ў Гродзенскай дыяцэзіі.
На працягу 17-і гадоў ксёндз Пётр Марцінец быў пробашчам парафіі Хрыста Валадара Сусвету ў Азёрах, душпастырам парафій Беззаганнага Сэрца Найсвяцейшай Панны Марыі ў Жытомлі і Беззаганнага Зачацця Найсвяцейшай Панны Марыі ў Кашубінцах (дэканат Гродна-Усход). Некалькі гадоў святар быў таксама дэканам дэканату Гродна-Усход і спаведнікам семінарыстаў, святароў і кансэкраваных асоб.
Пахавальная Імша адбудзецца ў пятніцу 11 лютага ў 12.00 па мясцовым часе ў парафіі святога Марціна ў Пачыне, Польшча (вул. Вейскa, 67, 44-174, Пачына).
Вечны адпачынак дай яму, Пане…
