9 лістапада Апостальскі Нунцый у Беларусі арцыбіскуп Антэ Ёзіч скіраваў ліст на імя дырэктара «Радыё Марыя» ў Беларусі ксяндза Аляксандра Фаміных, у якім павіншаваў супрацоўнікаў і слухачоў з 5-й гадавінай існавання гэтага каталіцкага радыё.
У сваім віншаванні прадстаўнік Папы Францішка ў нашай краіне, між іншым, напісаў:
«З нагоды 5-й гадавіны вяшчання „Радыё Марыя“ ў Беларусі жадаю выказаць вам шчырыя віншаванні з нагоды гэтай сціплай, але важнай даты, якая мае значэнне для жыцця ўсёй супольнасці мясцовага Касцёла.
Сёння ў абвяшчэнні Евангелля Касцёл шырока выкарыстоўвае новыя прылады, дасягненні навукова-тэхнічнага прагрэсу, сярод якіх важную ролю адыгрываюць радыё і інтэрнэт. Але сродкі камунікацыі — гэта толькі інструменты ў руках людзей.
Пяцігоддзе вяшчання на беларускай мове каталіцкага „Радыё Марыя“ — гэта перадусім вынік руплівай і ахвярнай працы святароў і свецкіх вернікаў: кваліфікаваных спецыялістаў у сваёй галіне, але перадусім шчырых і адданых апосталаў, якія нясуць Божае слова сваім братам і сёстрам.
На хвалях вашага радыё слухачы ў самых аддаленых куточках Беларусі і шматлікія суайчыннікі за мяжой могуць пачуць на роднай мове слова збаўлення і надзеі, слова настаўлення і парады, слова суцяшэння і падтрымкі.
На працягу двух апошніх гадоў увесь свет жыве ў сітуацыі каранавірусных абмежаванняў, калі для многіх вернікаў часты ўдзел у набажэнствах у касцёле стаў немагчымым. У гэтай складанай сітуацыі менавіта „Радыё Марыя“ па прыкладу Багародзіцы, якая дае людзям свайго Сына — Уцелаўлёнае Слова, дзякуючы транляцыям святых Імшыў набліжае Хрыста тым, хто не можа ўдзельнічаць у Эўхарыстыі.
Папа Францішак у сваім віншаванні, скіраваным у лютым гэтага года Ватыканскаму радыё з нагоды 90-годдзя з часу яго заснавання, напісаў, між іншым, такія знамянальныя словы:
„Радыё мае цудоўную асаблівасць: яно нясе слова нават у самыя загубленыя месцы, а ў нашы дні злучае яго таксама з выявамі і пісьмовым тэкстам.
З мужнасцю і творчасцю прамаўляйце да свету і такім чынам будуйце камунікацыю, здольную дапамагчы ўбачыць праўдзівы стан рэчаў“, — пажадаў працаўнікам радыё Святы Айцец.
Гэтыя пажаданні Папы Францішка, якога я маю гонар прадстаўляць у вашай узлюбленай краіне, сёння я хачу перадаць Вам, шаноўны ксёндз Аляксандр, а таксама ўсім супрацоўнікам „Радыё Марыя“ ў Беларусі, якія прычыніліся да яго стварэння і дзейнасці на працягу пяці гадоў існавання. Шчыра дзякую вам, дарагія сябры, за вашу высакародную працу дзеля Евангелля, за вашу вернасць і адвагу, за тое што ніякія цяжкасці, з якімі вы сутыкаецеся, не прымусілі замоўкнуць голас „Радыё Марыя“ на беларускай мове.
Няхай заступніцтва Маці Божай, чыё імя носіць ваша радыё, абароніць вас і вашых блізкіх ад усялякага зла, а Яе матчына апека няхай спрыяе развіццю і пашырэнню вяшчання і аўдыторыі», — пажадаў Апостальскі Нунцый Антэ Ёзіч, удзяліўшы апостальскае благаслаўленне ўсім супрацоўнікам і слухачам «Радыё Марыя» ў Беларусі як задатак шчодрых Божых ласкаў.
