18 ліпеня, на заканчэнне ўрачыстасцяў у гонар Маці Божай Шкаплернай у Гудагаі, біскуп Віцебскі Алег Буткевіч запрасіў усіх ахвотных у жніўні ўзяць удзел у фэсце Маці Божай Валадаркі Азёраў у Браславе.
Кіраўнік беларускага каталіцкага епіскапату ўзначаліў цэлебрацыю заключнай святой Імшы ў межах сёлетніх урачыстасцяў Маці Божай Шкаплернай у Гудагаі. На заканчэнне цэлебрацыі пастыр Касцёла на Віцебшчыне запрасіў усіх шанавальнікаў Найсвяцейшай Панны Марыі ў свой родны Браслаў на ўрачыстасці ў гонар Маці Божай Валадаркі Азёраў.
Сёлета фэст у Браславе пройдзе 20 і 21 жніўня (пятніца і субота). Праграма ўрачыстасцяў будзе пададзена пазней.
Летась з-за складанай эпідэміялагічнай сітуацыі Браслаўскі фэст праходзіў у скарочаным фармаце. У прыватнасці, не адбылася традыцыйная працэсія з абразом Маці Божай Валадаркі Азёраў вакол Замкавай гары.
