Увечары 11 мая перад будслаўскай базылікай, дзе раніцай здарыўся моцны пажар, сабраліся вернікі, якія моляцца Ружанец.
Май у Каталіцкім Касцёле з’яўляецца месяцам, асаблівым чынам прысвечаным Найсвяцейшай Панне Марыі. У Будславе тутэйшыя вернікі і госці разам сабраліся на ружанцовую малітву перад святыняй, на якой яшчэ працуюць пажарныя.
Як паведаміў Catholic.by пробашч парафіі Унебаўзяцця Найсвяцейшай Панны Марыі ў Будславе ксёндз Дзмітрый Дубовік, у сераду і чацвер 12 і 13 мая святая Імша ў Будславе будзе цэлебравацца а 18-й гадзіне ў Доме пілігрыма з правага боку ад базылікі, што паміж касцёлам і плябаніяй.
«Як толькі адпаведнымі службамі будзе дадзены дазвол, пачнем маліцца ў старым касцёле. Там жа будзе змешчаны і абраз Маці Божай Будслаўскай», — падзяліўся планамі святар.
