13 сакавіка ў Мінскім тэалагічным каледжы імя святога Яна Хрысціцеля адбылася першая сустрэча навучэнцаў і выкладчыкаў з Апостальскім адміністратарам sede vacante Мінска-Магілёўскай архідыяцэзіі біскупам Казімірам Велікасельцам.
На пачатку сустрэчы дырэктар каледжа Ксёндз Доктар Грэміяльны Канонік Ян Крэміс пазнаёміў іерарха з гісторыяй дзейнасці і вынікамі навучальнага і фармацыйнага працэсу навучальнай установы.
У сваёй прамове да навучэнцаў і выкладчыкаў каледжа біскуп Казімір Велікаселец засяродзіў увагу слухачоў на асаблівай ролі Святога Пісання і малітвы ў працэсе асабістага сталення веры, а таксама ў хрысціянскім выхаванні дзяцей і моладзі.
Абапіраючыся на словы літаратурных класікаў і навуковых дзеячаў, іерарх падкрэсліў вялікую ролю Божага Слова. Цытуючы Міхайлу Ламаносава, ён сказаў:
«Мне Бог даў дзве кнігі: гэты свет і Біблію. Гэты свет кажа мне пра мудрасць Бога, а Біблія прамаўляе пра любоў Бога і Яго святасць».
Біскуп Казімір нагадаў, што «Біблія — гэта кніга мудрасці, якая дае адказы на ўсе жыццёвыя пытанні». І яшчэ дадаў, што мы павінны памятаць, што нам пра Бога кажа і сумленне, бо гэта голас Бога ў нашай душы.
Працягваючы свае разважанні, пастыр паказаў каштоўнасць малітвы, бо яна суправаджае чалавека ад самага пачатку існавання:
«Праз малітву Бог адорвае кожнага сваёй жывой прысутнасцю».
Навучэнцаў вельмі зацікавіла, што паўплывала на рэлігійнае жыццё і выбар жыццёвага паклікання іерарха. Біскуп Казімір адказаў, што вялікі ўплыў у ягоным жыцці мела няспынная малітва бабулі і маці, а таксама ўрокі катэхізісу, якія выкладаў тата падчас дарогі да касцёла на ровары, што знаходзіўся на адлегласці 60 км.
З вялікай радасцю шаноўны госць распавядаў пра гісторыю свайго святарскага паклікання, а таксама пра ролю Маці Божай Вастрабрамскай, перад абразом якой пачуў: «Ідзі ў семінарыю»; узгадаў пра сем гадоў служэння ў Ішкалдзі і ў іншых месцах, куды Пан Бог яго скіроўваў.
Напрыканцы сустрэчы ўсе прысутныя атрымалі падарунак з рук біскупа Казіміра: кніжку «Христианская наука» і абразок з выявай Святой Сям’і.
Навучэнцы са свайго боку падзякавалі за цудоўную сустрэчу шаноўнаму госцю, узгадаўшы словы са Святога Пісання, што пастыр ведае сваіх авечак, а авечкі ведаюць пастыра. Біскуп Казімір заахвоціў навучэнцаў дзяліцца атрыманымі ведамі, а таксама сваёй верай.
Сутрэча скончылася благаслаўленнем, якое ўдзяліў усім прысутным біскуп Казімір Велікаселец.
