21 лютага Ганаровы Мітрапаліт Мінска-Магілёўскі арцыбіскуп Тадэвуш Кандрусевіч удзяліў пяці студэнтам Міждыяцэзіяльнай вышэйшай духоўнай семінарыі ў Гродне паслугу акалітату і ўстанавіў аднаго кандыдата да дыяканату і святарства.
Акалітамі сталі семінарысты Яўген Абрамаў, Віталь Гурэц, Арцём Кір’янаў, Павел Пагасай і Аляксандр Шыманскі.
У гэты ж дзень, як паведамляецца на сайце семінарыі, кандыдатам да дыяканату і святарства быў устаноўлены студэнт пятага курса Андрэй Юхнік.
«З гэтага моманту акаліты будуць непасрэдна дапамагаць святару падчас цэлебрацыі Эўхарыстыі. Яны будуць не толькі дакранацца да Найсвяцейшага Цела Езуса Хрыста, але і несці яго далей — вернікам і патрабуючым хворым», — звярнуўся іерарх да акалітаў.
Устанаўленне кандыдатам да святарства арцыбіскуп акрэсліў як «выраз даверу, які Касцёл выказвае таму, хто мае намер у будучыні служыць Богу і людзям».
Прыняццю паслуг папярэднічалі трохдзённыя велікапосныя рэкалекцыі, што завершыліся напярэдадні семінарыйнай урачыстасці. Дні духоўных практыкаванняў спрыялі больш глыбокай падрыхтоўцы семінарыстаў да чарговага адказнага кроку на шляху да святарства.
