З 17 па 20 лютага ў Міждыяцэзіяльнай вышэйшай духоўнай семінарыі ў Гродне прайшлі рэкалекцыі, якія для будучых святароў правёў Ганаровы Мітрапаліт Мінска-Магілёўскі арцыбіскуп Тадэвуш Кандрусевіч.
Як адзначаецца на сайце семінары vdsgrodna.by, арцыбіскуп Кандрусевіч прысвяціў дні духоўных разважанняў адразу некалькім тэмам: навяртанне і пакаянне, семінарыйная фармацыя, малітва і Эўхарыстыя ў жыцці святара, марыйная духоўнасць у жыцці святара, цэлібат і сталая фармацыя.
«Але галоўнае, — падкрэсліў іерарх, — быць і заставацца чалавекам».У семінарыйнай капліцы студэнты збіраліся на адарацыю Найсвяцейшага Сакрамэнту, маліліся Ютрань і Камплету. Пятніца была прысвечана пакутным набажэнствам і сакрамэнту пакаяння. Цэнтрам кожнага дня была святая Імша — сустрэча з жывым Езусам у Эўхарыстыі.
Адным з пунктаў праграмы была нефармальная сустрэча з арцыбіскупам, падчас якой іерарх распавёў пра свой досвед служэння ў Беларусі і Расіі, а таксама адказаў на хвалюючыя пытанні будучых святароў.
Ад семінарыстаў арцыбіскуп Кандрусевіч атрымаў у падарунак майку з выявамі ўсіх, хто ў сценах заснаванай арцыбіскупам Кандрусевічам семінарыі рыхтуецца да святарства.
