З 25 па 27 верасня ў парафіі святога Міхала Арханёла ў Навагрудку адбыліся рэкалекцыі, якія правёў місіянер з Бразіліі айцец Антанэлло Кадэду.
Рэкалекцыі сабралі вялікую колькасць удзельнікаў, з якіх большасць склалі вернікі з усёй Беларусі: Мінска, Гродна, Ліды, Віцебска, Паставаў, Горак, Наваполацка, Ваўкавыска і іншых месцаў.
Праграма духоўных практыкаванняў была вельмі насычанай.
Першы дзень, пятніца, распачаўся адарацыяй Найсвяцейшага Сакрамэнту. Сабраным пажадалі плённага ўдзелу ў рэкалекцыях. Другі дзень быў часам інтэнсіўнага разважання над Божым Словам праз прызму місіянерскага досведу а. Антанэлло і малітвы. Апошні дзень рэкалекцый завяршыўся супольнай нядзельнай Эўхарыстыяй.
Навагрудчане і госці былі вельмі ўдзячныя Богу за магчымасць удзельнічаць у гэтых духоўных практыкаваннях і ўдзячныя рэкалекцыяністу за дар супольнай малітвы.
Католікі з усёй Беларусі мелі выдатную магчымасць бліжэй пазнаёміцца з мясцовымі вернікамі, якія гасцінна прымалі іх у сябе дома.
Таксама яны змаглі дакрануцца да багатай духоўнай і культурнай спадчыны Навагрудчыны.
