29 жніўня ў капліцы Маці Божай Чэнстахоўскай у Дубатоўцы, якая знаходзіцца на тэрыторыі парафіі Найсвяцейшай Тройцы ў Данюшаве (Смаргонскі дэканат), адбыліся ўрачыстасці з нагоды 90-годдзя яе асвячэння.
Як паведамляе партал Grodnensis.by, урачыстасці ўзначаліў Генеральны вікарый Гродзенскай дыяцэзіі біскуп Юзаф Станеўскі. У іх узялі ўдзел шматлікія вернікі з усяго наваколля, а таксама святары і вернікі з суседніх парафій.
Капліца, якая стаяла на гэтым месцы раней, доўгі час да 1839 года была ўніяцкай, затым належала праваслаўным.
Падчас Першай сусветнай вайны яна была цалкам знішчана. У 1930 г. на яе месцы была пабудавана новая капліца.
Пасля Другой сусветнай вайны будынак капліцы належаў калгасу, у ім мялі лён. У 1990 г. капліцу вярнулі вернікам.
У гаміліі падчас святой Імшы біскуп звярнуў увагу на тое, як важна памятаць пра свае карані, продкаў, якія перадалі веру, і вяртацца ў родныя мясціны, дзе вера ўзрастала.
На заканчэнне ўрачыстасцяў пробашч данюшаўскай парафіі кс. Уладзіслаў Сурвіла падзякаваў усім мясцовым вернікам, чыімі малітвамі і намаганнямі ўдалося вярнуць і аднавіць капліцу.
Ён выказаў падзяку таксама гасцям на чале з біскупам, якія ў гэты дзень сваім удзелам падзялілі і памножылі радасць парафіянаў.
