27 ліпеня Курыя Мінска-Магілёўскай архідыяцэзіі заявіла рашучы пратэст аўтарам відэакліпа, сцэны якога былі без дазволу знятыя ў касцёле Найсвяцейшай Тройцы (святога Роха) на Залатой Горцы ў Мінску і абражаюць рэлігійныя пачуцці вернікаў.
Парафіяне найстарэйшай каталіцкай супольнасці беларускай сталіцы абураныя кліпам, які, нягледзячы на папярэджанне пра недапушчальнасць яго публічнай дэманстрацыі, ўсё ж такі выйшаў на прастору інтэрнэта. Невядома, з якіх прычын спявачка Аляксандра Салавейчык вырашыла здымаць відэа з такім брудным сэнсам у мурах святыні, але ўжо назад гэтага не вернеш.
Хоць пробашч Залатагорскай парафіі ксёндз канонік Юрый Санько ад імя вернікаў прасіў не распаўсюджваць кліп, відаць, жаданне таннай папулярнасці з дапамогай скандалу і «хайпу» перамагло пачуццё сораму і годнасці. Магчыма, выканаўца не надта ўпэўнена ў сваіх творчых здольнасцях, таму і пайшла на такі сумніўны з маральнага пункту гледжання і па-чалавечы непрыгожы крок.
У нядзелю 16 жніўня з нагоды парафіяльнай урачыстасці святога Роха ў залатагорскай святыні адбудзецца адмысловае экспіяцыйнае набажэнства — малітва перапрашэння за знявагу святога для многіх пакаленняў мінчан месца, дзе пахаваныя нашыя продкі.
У гэты дзень святары і вернікі будуць маліць Бога аб прабачэнні за ўчынены ў касцёле грэх святатацтва.
