1 чэрвеня біскуп Гродзенскі Аляксандр Кашкевіч наведаў дыяцэзіяльны санктуарый Маці Божай Каралевы нашых сем’яў у Тракелях.
Як паведамляе Grodnensis.by, з нагоды Міжнароднага дня абароны дзяцей іерарх маліўся ў інтэнцыі ўсіх дзяцей, асабліва тых, якія ў гэтым годзе ўпершыню прыступаюць да святой Камуніі. Урачыстасці Першай Камуніі з прычыны эпідэміі каранавірусу былі перанесены на восень.
У святыні біскуп Кашкевіч цэлебраваў святую Імшу, падчас якой маліўся таксама за ўсіх хворых і церпячых з прычыны небяпечнага вірусу.
Ён даручыў Маці Божай усе сем’і Гродзенскай дыяцэзіі, просячы, каб яны былі моцныя Богам і каб эпідэміялагічная сітуацыя не аслабіла іх веры.
Кусташ санктуарыя ксёндз Юрый Бяганскі пазнаёміў іерарха з працамі, якія ў апошні час вельмі інтэнсіўна вядуцца пры санктуарыі.
Пастыр Касцёла на Гродзеншчыне выказаў здзіўленне, што з кожным днём змяняецца аблічча санктуарыя, становячыся ўсё прыгажэйшым, і захапляе хараством тэрыторыя вакол святыні.
Біскуп Аляксандр Кашкевіч абмеркаваў з кусташам правядзенне сёлетняй адпустовай урачыстасці ў санктуарыі, якая, напэўна, адбудзецца з-за эпідэміі ў іншым фармаце і ў іншы час.
Пра праграму сёлетняй адпустовай урачыстасці ў Тракелях будзе паведамлена пазней.
