27 студзеня ў розных мясцінах Беларусі ўрачыста адзначылі літургічны ўспамін благаслаўлёнага біскупа Юрыя Матулевіча.
Гэты Віленскі біскуп, выкладчык, аднавіцель і генерал Ордэна Марыянаў, быў заснавальнікам дзвюх жаночых кангрэгацый, у тым ліку кангрэгацыі Сясцёр Слуг Езуса ў Эўхарыстыі.
Папа Пій XI назваў біскупа Юрыя Матулевіча «чалавекам сапраўды святым».
Як паведаміў сайт кангрэгацыі Сясцёр Слуг Езуса ў Эўхарыстыі Eucharystki.wordpress.com, з нагоды ўспаміну заснавальніка сваёй законніцкай супольнасці сёстры правялі адмысловыя катэхетычныя заняткі для дзяцей і моладзі, на якіх распавялі пра жыццё, дзейнасць і духоўнасць Юрыя Матулевіча.
Сёстры разам з дзецьмі і моладдзю чыталі яго «Духоўны дзённік» і абмяркоўвалі словы біскупа пра самаахвярнае служэнне Хрысту і Касцёлу, імкненне да дасканаласці, апостальства як праяву любові да Хрыста, даступнае не толькі святарам і законнікам, але і свецкім людзям.
У некаторых кляштарах сясцёр адбыліся адарацыі, падчас якіх была магчымасць перад Найсвяцейшым Сакрамэнтам паразважаць над словамі благаслаўленага біскупа, які ўсяго сябе аддаваў Божай волі і нават згаджаўся быць «анучай, якою ўсё мыюць і, выкарыстаўшы, кідаюць у цёмны і брудны кут».
«Няхай бы і я быў гэтак выкарыстаны і ўжыты, каб толькі ў доме Тваім было крыху чысцей і святлей», — пісаў благаслаўлёны Юры Матулевіч у сваім дзённіку.
Знамянальна, што ў кляштары сясцёр Эўхарыстак у Друі, дзе ў 1923 годзе была заснавана Кангрэгацыя, успамін благаслаўлёнага біскупа Юрыя Матулевіча будзе адзначацца ўвесь тыдзень, да 2 лютага — свята Ахвяравання Пана і Дня кансэкраваных асобаў.
