Пошук


10.01.2020 14:45   Тэкст і фота: Дар'я Семянько / Catholic.by

8 студзеня адбылася аплаткавая сустрэча біскупа Аляксандра Яшэўскага SDB з удзельнікамі касцёльных хораў і музыкамі Магілёва.

Па традыцыі сустрэча пачалася святой Імшой у катэдры Унебаўзяцця Найсвяцейшай Панны Марыі і св. Станіслава, цэлебрацыю якой узначаліў Біскупскі вікарый для горада Магілёва і Магілёўскай вобласці.

Біскуп прывітаў усіх музыкаў, якія сабраліся ў гэты дзень на Імшы, а іх было нямала.

У гаміліі іерарх падкрэсліў, што ўсе свае справы чалавек павінен давяраць Богу, і гэты прынцып працуе як у творчасці, так і ва ўласным жыцці: «Прымаючы рашэнні, задавайце пытанне: „Ці гэта да спадобы Богу?“ Калі мы прыслухаемся да голасу Божага, зможам пачуць, як Айцец часам прапануе зусім іншыя, нечаканыя рашэнні. Таму што Ён — поўная любоў, любоў без межаў».

Перад дзяленнем аплаткамі біскуп падзякаваў музыкантам і спевакам з усіх трох парафій Магілёва.

«Вы не толькі ўпрыгожваеце святую Імшу сваімі галасамі і музыкай, але і служыце Богу падчас літургіі нароўні са святарамі і міністрантамі.

Ад вас таксама залежыць, наколькі думкі і сэрцы людзей будуць пры Богу», — сказаў іерарх.

Сёння ў магілёўскіх парафіях спевам служаць тры хоры: мужчынскі Felix Anima (кіраўнік Таццяна Кузіна, канцэртмайстар Нэллі Сасіна), жаночы Totus Tuus (кіраўнік Яна Шумская), а таксама хор парафіі св. Антонія (кіраўнік Аліна Васюкова).

Падчас сустрэчы біскуп Аляксандр Яшэўскі асаблівым чынам падзякаваў арганісту катэдральнай парафіі Яўгену Захараву за 30 гадоў плённага служэння Богу і Касцёлу.

Юбіляр атрымаў падзячную грамату, а таксама прымаў шчырыя віншаванні ад усіх вернікаў Магілёва. Такія граматы атрымалі таксама музыкі, якія прысвяцілі падобнаму служэнню ў Касцёле больш за 10 гадоў. Была адзначана і вялікая заслуга ў развіцці парафіі св. Казіміра і св. Ядвігі Юліі Алейнікавай, якая таксама атрымала грамату ад біскупа.

Пасля дзялення аплаткамі свята працягнула забаўляльная праграма, якую падрыхтавала спявачка хору Totus Tuus Анастасія Раманава.

 

Абноўлена 10.01.2020 16:49
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа