7 студзеня ў Цэнтральным дзіцячым парку імя Максіма Горкага ў Мінску прайшоў фестываль сям’і «Горад шчаслівых людзей», праведзены з удзелам прасямейных каталіцкіх арганізацый.
Дата для яркага свята была абрана невыпадкова: яго правялі ў дзень, калі праваслаўныя хрысціяне адзначаюць Нараджэнне Хрыстова.
Фестываль сям’і — гэта святочны сацыяльна-дабрачынны праект, які праходзіць некалькі разоў на год у Мінску, а таксама ў іншых гарадах Беларусі.
Слова на адкрыццё фэсту прамовіў ксёндз канонік Юрый Санько, пробашч парафіі размешчанага непадалёк касцёла Найсвяцейшай Тройцы (святога Роха) на Залатой Горцы. Разам з віншаваннямі, скіраванымі ад імя каталіцкіх вернікаў праваслаўным братам, святар уручыў падарункі ад сваёй парафii для шматдзетных сем’яў.
Фестываль сям’і — гэта час усмешак, весялосці і цудаў, напоўненых асаблівым сэнсам.
«Езус Хрыстус нарадзіўся, каб мы былі шчаслівыя», — пад такім дэвізам праходзіла свята сям’і ў сталіцы.
Госці маглі на пэўны час апынуцца ў чароўным свеце і адчуць казачную атмасферу Божага Нараджэння дзякуючы захапляльнай творчай праграме, забаўляльным конкурсам і пачастункам.
Валанцёраў руху абароны жыцця і сямейных каштоўнасцяў можна было знайсці ў намёце «Мама+Я», у якой госці мелі магчымасць паспаборнічаць у спавіванні лялек, дакрануцца да нябачнага вачам свету «да нараджэння»: паглядзець і нават патрымаць у руках фігуркі дзетак на розных тэрмінах ад зачацця, узяць буклеты з важнай інфармацыяй на тэму перадачы жыцця ў сужэнстве і сям’і, а таксама даведацца пра дзейнасць дабрачынных каталіцкіх арганізацый у сферы абароны жыцця і сям’і.
