21 снежня ў Мінскім тэалагічным каледжы імя св. Яна Хрысціцеля адбылася аплаткавая сустрэча, якую ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
Сустрэча біскупа са студэнтамі і выкладчыкамі пачалася святой Імшой. У гаміліі біскуп заклікаў, каб у гэты час, час чакання Нараджэння Езуса Хрыста, за клопатам падрыхтоўкі да свята, прыгатавання вігілійных страў, упрыгожвання дома, пошуку падарункаў «мы не забыліся пра самае галоўнае: падрыхтаваць месца маленькаму Езусу, зрабіць свае сэрцы сапраўды гатовымі да Нараджэння Збаўцы».
Пасля Імшы навучэнцы каледжа прадставілі батлейку. Потым біскуп благаславіў аплаткі — «сімвал любові, еднасці і дабрыні» — і пажадаў, каб каледж прыносіў «плён для тых людзей, якія, дзякуючы здабытым ведам, будуць працаваць на жніве Божым у нашай краіне, нашай Бацькаўшчыне, каб кожны навучэнец меў пакліканне быць добрым хрысціянінам і сведкам Хрыста». Затым удзельнікі сустрэчы падзяліліся аплаткамі.
За гарбатай і салодкім сталом сабраныя мелі магчымасць нязмушана весці размову.
Увогуле ўся сустрэча адбывалася ў вельмі прыемнай, сямейнай атмасферы, радасць у вачах прысутных была бачная здалёк.
Напрыканцы сустрэчы навучэнцы каледжа павіншавалі біскупа Юрыя Касабуцкага і дырэктара каледжа ксяндза доктара грэміяльнага каноніка Яна Крэміса з надыходзячым святам і падзякавалі за навуку і клопат аб іх духоўным развіцці.
Скончылася сустрэча благаслаўленнем, якое ўдзяліў біскуп.
