У кастрычніку ў Каталіцкім Касцёле на Беларусі ўзнікла новае душпастырства — «Жывы Місійны Ружанец». Гэта апостальскі малітоўны рух свецкіх, якія праз штодзённую малітву на ружанцы духоўна падтрымліваюць святароў і кансэкраваных асобаў.
Вернікі моляцца штодзённа прыватна альбо супольна ў любы зручны час у інтэнцыі трыумфу Беззаганнага Сэрца Найсвяцейшай Панны Марыі ў служэнні Святога Айца Францішка, біскупаў, святароў і кансэкраваных асобаў, а таксама аб новых святых пакліканнях да кансэкраванага жыцця, святарства і місіянерскага служэння.
Апостальскі малітоўны рух «Жывы Місійны Ружанец» ужо налічвае крыху больш за 120 чалавек.
Душпастырства паступова развіваецца: за два месяцы да вернікаў з розных парафій Мінска далучыліся вернікі з розных вёсак, аграгарадкоў і гарадоў: Бабруйск, Баранавічы, Бараўляны, Барысаў, Брэст, Ваўкавыск, Віцебск, Гатава, Глыбокае, Даўгінава, Дзяржынск, Ждановічы, Жодзіна, Заслаўе, Крамяніца, Лагойск, Магілёў, Маладзечна, Наваельня, Наваполацк, Негарэлае, Орша, Пінск, Смаргонь, Стоўбцы, Фаніпаль, Шчучын і інш.
Сёння ўжо сфармавалася шэсць Ружанцовых ружаў па 20 чалавек па агульнай колькасці таямніц святога Ружанца:
- Маці Божай Каралевы святога Ружанца
- Маці Божай Чэнстахоўскай
- Маці Божай Фацімскай
- Маці Божай Заслаўскай
- Маці Божай Будслаўскай, Апякункі Беларусі
- Маці Божай Беззаганна Зачатай.
Цяпер працягваецца фармаванне сёмай Ружанцовай ружы Маці Божай Нястомнай Дапамогі.
З гэтай мэтай ініцыятыўная група запрашае жадаючых далучацца да апостальскага малітоўнага руху «Жывы Місійны Ружанец»: усяго адна таямніца Ружанца на дзень, а Божыя ласкі атрымліваеш, як за ўвесь Ружанец.
Ружанцовая малітва мае вялікую моц, а тым больш, калі молішся на хвалу Божую не адзін, а ў супольнасці!
Далучыцца да малітвы і атрымаць усю падрабязную інфармацыю магчыма па тэлефоне:
+375 29 557 08 27 — каардынатар руху Анастасія-Алена Блусянкова
альбо дасылаць паведамленні на вайбер на гэты нумар ці па электроннай пошце: alena2012misericordia@gmail.com
Па пытаннях душпастырства звяртацца па тэлефоне:
+375 29 695 53 51 — ксёндз канонік Юрый Санько
