4 лістапада ў Міждыяцэзіяльнай вышэйшай духоўнай семінарыі ў Гродне адбыўся дзень засяроджання. Яго правёў кс. Юрый Жэгарын, пробашч парафіі св. Міхала Арханёла ў Навагрудку.
«Асэнсаваць мінулае, каб зразумець сучаснасць» — такі заклік прагучаў ва ўводнай прамове. Гэтыя словы сталі тэмай для разважання на працягу дня.
Аскетычныя канферэнцыі, агульныя і індывідуальная малітвы, адарацыя Найсвяцейшага Сакрамэнту, святая Імша спрыялі таму, каб семінарысты нанава паразважалі над глыбінёй сваіх адносінаў з Богам, без якіх немагчымае штодзённае жыццё сапраўднага вучня Хрыста.
Дзякуючы разнастайным жыццёвым прыкладам, прыведзеным кс. Юрыем Жэгарыным, семінарысты маглі яшчэ раз усвядоміць прыгажосць, сэнс і адказнасць свайго жыццёвага паклікання, а таксама мелі магчымасць вучыцца развіваць пакліканне і рабіць усё неабходнае, каб не змарнаваць яго.
Час духоўных практыкаванняў стаў для семінарыйнай супольнасці хвілінамі шчырасці з Богам, якія дапамогуць будучым святарам распазнаваць свой непаўторны жыццёвы шлях і няспынна сузіраць блізкасць Бога ў штодзённым жыцці.
Завяршыўся дзень засяроджання Нешпарамі за памерлае духавенства, семінарыстаў і свецкіх людзей, якія працавалі ў гэтай семінарыі, а таксама за родных семінарыстаў і выхавацеляў, якія ўжо адышлі ў вечнасць.
