27 кастрычніка, ва ўрачыстасць гадавіны кансэкрацыі былога кармэліцкага касцёла Унебаўзяцця Найсвяцейшай Панны Марыі ў Мсціславе (Магілёўскі рэгіён), вернікі мясцовай парафіі прывіталі свайго новага пробашча ксяндза Міхала Бубена, якога ўвёў на пасаду Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB.
Ва ўрачыстай цэлебрацыі ўзялі ўдзел кс. прэлат Андрэй Стэцкевіч, дэкан Магілёўскі кс. Віталій Маргуноў, святары з парафій дэканату, госці з Магілёва, Мінска і Шчучына.
Пры ўваходзе ў святыню біскуп Яшэўскі акрапіў сабраных вернікаў асвячонаю вадою, пасля чаго прамовіў прывітальнае слова, у якім нагадаў усім прысутным складаную, але багатую знакамі Божай апекі гісторыю мсціслаўскай парафіі.
Разважаючы пра абавязкі пробашча, якія даручыў ксяндзу Міхалу Бубену Мітрапаліт Мінска-Магілёўскі арцыбіскуп Тадэвуш Кандрусевіч, біскуп Аляксандр падкрэсліў, што ксёндз Міхал з’яўляецца першым пробашчам у Мсціслаўі пасля вялікага перапынку.
Папярэднія душпастыры — кс. Караль Тамэцкі і кс. Робэрт Мацееўскі — былі тут адміністратарамі з правамі пробашча, а апошні час са святарскай паслугай да мясцовых вернікаў часова даязджаў пробашч з суседняга Крычава кс. Павел Адамовіч.
«Моцаю паўнамоцтваў і па распараджэнні арцыпастыра Мінска-Магілёўскай архідыяцэзіі я даручаю табе абавязкі пробашча парафіі Унебаўзяцця Найсвяцейшай Панны Марыі і ўрачыста абвяшчаю, што ты атрымліваеш у гэтай парафіі ўладу, якой надзяляе пробашча права Рыма-Каталіцкага Касцёла.
Аддаю табе ў апеку духоўнае дабро вернікаў, нагадваючы, што калісьці ты будзеш за іх адказваць на судзе Божым», — прамовіў узнёслыя словы абраду ўвядзення пробашча іерарх.
Перад пачаткам урачыстай святой Імшы ксёндз Міхал прамовіў урачыстае вызнанне веры і даў прысягу вернасці. Адпаведныя дакументы былі падпісаныя на алтары.
Пасля абрадаў увядзення пробашча распачалася Эўхарыстыя, цэлебрацыю якой узначаліў біскуп Аляксандр Яшэўскі.
У прамоўленай гаміліі на падставе Евангелля ад Мацвея (гл. Мц 16, 13–19) іерарх разважаў над тым, якім павінен быць добры пастыр. Звяртаючыся да новапрызначанага мсціслаўскага пробашча, біскуп прывёў у прыклад асобу кардынала Конрада Краеўскага, які ад імя папы Францішка клапоціцца пра бедных, убогіх і патрабуючых, і заахвоціў, каб новапрызначаны пробашч таксама «не сядзеў у плябаніі, а шукаў вернікаў і паказваў ім шлях да святыні».
