Субота 26 кастрычніка была вельмі радасным і доўгачаканым днём для мінскай парафіі святых апосталаў Пятра і Паўла і св. Яўгена дэ Мазэно. Дапаможны біскуп Мінска-Магілёўскай архідыяцэзіі Юрый Касабуцкі благаславіў крыж і асвяціў зямлю, дзе будзе ўзведзены парафіяльны касцёл.
Ва ўрачыстай падзеі ўдзельнічалі кс. канонік Уладзіслаў Завальнюк, душпастыры гэтай парафіі пробашч а. Пётр Бялевіч ОМІ і а. Павел Лемех OMI, семінарысты з духоўным айцом, будаўнікі і вернікі.
Тым самым распачалося будаўніцтва касцёла святых апосталаў Пятра і Паўла і святога Яўгена дэ Мазено.
Біскуп у гаміліі засяродзіў увагу на значэнні крыжа ў жыцці хрысціяніна, а таксама значэнні касцёла для парафіі. У сваіх словах ён заахвоціў будаваць Касцёл як супольнасць веруючых.
Узгадваючы гісторыю парафіі, у якой гэта ўжо другое месца пад будаўніцтва святыні, іерарх сказаў, што Пан Бог мае свае планы, а мы павінны давяраць Яго Провіду.
