У нядзелю 29 верасня ў катэдральнай парафіі Езуса Міласэрнага ў Віцебску адбылася святая Імша падзякі за сёлетні ўраджай — своеасаблівыя «малітоўныя дажынкі».
Як паведамляе партал Catholicnews.by, цэлебрацыю ўзначаліў пробашч парафіі кс. канонік Валерый Орсік.
На пачатку нядзельнай Эўхарыстыі святар падкрэсліў, што чалавек павінен быць заўсёды ўдзячны Богу, які дае жыццё і ўсё неабходнае для жыцця.
Нездарма само слова «Эўхарыстыя» азначае «падзяка».
Пра ўменне дзякаваць Богу за ўсе атрыманыя дары казаў удзельнікам святой Імшы і дыякан Алег Зямчонак у прамоўленым казанні.
У працэсіі з дарамі віцебскія вернікі прынеслі да алтара Пана садавіну і гародніну — плады сёлетняга ўраджаю.
Знакам асаблівай пашаны да Багародзіцы за атрыманы плён працы чалавечых рук і плады зямлі напярэдадні ружанцовага месяца кастрычніка стаў вялікі ружанец, зроблены з… бульбы.
Напрыканцы Імшы ксёндз Валерый благаславіў новы ўраджай і падзякаваў усім, хто дапамог у падрыхтоўцы да свята.
