27 верасня ў мінскай архікатэдры Найсвяцейшага Імя Марыі прайшла малітоўная сустрэча Мінскага катэдральнага капітулу. Яна адбылася напярэдадні свята святых Арханёлаў Міхала, Габрыэля і Рафала.
Мінскі катэдральны капітул быў заснаваны 14 студзеня 2017 г. Кангрэгацыяй па справах духавенства і атрымаў назву ў гонар св. Арханёла Міхала і Маці Божай Будслаўскай. Арханёл Міхал таксама з’яўляецца заступнікам Мінска-Магілёўскай касцёльнай правінцыі — усяго Касцёла ў Беларусі.
У функцыі членаў капітулу ўваходзіць выкананне ўскладзеных біскупам абавязкаў у сферы духоўнага выхавання вернікаў, развіцця сацыяльных праектаў, удзелу ў канферэнцыях і сімпозіумах па гісторыі хрысціянскага Касцёла.
Таму для іх асабліва важнае свята ў гонар Арханёла Міхала. Яго вобраз нагадвае кожнаму святару пра паняцці абавязку, гонару, гатоўнасць у хвіліну спакусы стаць на абарону духоўных каштоўнасцяў.
Дзеі Арханёла Міхала, апісаныя ў Старым і Новым Запаветах, сталі прыкладам для многіх пакаленняў вернікаў. Арханёлы аб’яўляюць людзям Божую волю. У перакладзе з габрэйскай мовы «арханёл» азначае «старэйшы пасланнік», Міхал — «Хто ж як Бог», што стала дэвізам пастырскага служэння арцыбіскупа Тадэвуша Кандрусевіча, Мітрапаліта Мінска-Магілёўскага, якога25 ліпеня 1989 г. папа Ян Павел ІІ прызначыў Апостальскім адміністратарам Мінскай дыяцэзіі для католікаў у Беларусі. Біскупскую сакру, якая адбылася 20 кастрычніка 1989 г. у базыліцы св. Пятра ў Рыме, таксама ўдзяліў яму Ян Павел ІІ.
Арханёл Міхаіл заваяваў права быць першым сярод анёлаў. Ён перамог Люцыфера, які выступіў супраць Бога. Люцыфер прапаноўваў шматлікім анёлам пайсці за ім. Некаторыя з іх пагадзіліся. Зараз яны называюцца дэманамі. Міхал адмовіўся ад прапановы і ўзначаліў сілы, якія абаранялі створаны Богам светапарадак. Ён стаў нябесным заступнікам войска тых, хто пакліканы ў хвіліну небяспекі не спалохацца і прыйсці з дапамогай да патрабуючых.
Члены Мінскага катэдральнага капітулу вядуць актыўную дзейнасць у галіне катэхізацыі і ў даследаваннях гісторыі Каталіцкага Касцёла.
З іх удзелам праводзяцца экуменічныя праекты, экскурсіі і лекцыі на рэлігійныя тэмы, яны арганізуюць шматлікія выставы.
Члены капітулу ганарацца сваім вялікім заступнікам Арханёлам Міхалам і моляцца за першага біскупа Беларусі Тадэвуша Кандрусевіча, які распачаў новы этап у сучаснай гісторыі Касцёла на нашай зямлі, у юбілей 30-годдзя яго прызначэння.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)