12–14 ліпеня ў Лебедзеве прайшла сустрэча па распазнанні паклікання для хлопцаў. На тры ліпеньскія дні парафія Найсвяцейшага Сэрца Езуса сталася месцам сустрэчы хлопцаў, якія з’ехаліся сюды з розных парафій Мінска-Магілёўскай архідыяцэзіі.
Галоўным кіраўніком мерапрыемства быў кс. Павел Эйсмант, адказны за першы курс навучання будучых святароў, якому дапамагалі семінарысты Дзмітрый і Марцін.
Дэвізам сустрэчы былі словы: «Быць рыбаком, а не рыбкай на кручку».
Падчас сумесных размоў кіраўнік духоўных практыкаванняў звяртаў увагу на дзве асноўныя рэчы. Па-першае, на тое, як важна ў сучасным свеце ўмець лавіць, прыцягваць людзей да Хрыста, які дае сапраўдную свабоду. І па-другое, што не менш патрэбна дбаць, каб самому не трапіць у сеткі, якія знявольваюць, пазбаўляюць сапраўдных каштоўнасцяў, аптымізму і яснай мэты ў жыцці.
Практыкаванні духу не абмежаваліся толькі малітваю, магчымасцю размовы са святарамі і з тымі, хто рыхтуецца да святарства.
Хлопцы маглі выйсці не толькі за сцены дома, але і за межы звычайнага адпачынку, накіраваўшыся ў палачанскі конна-спартыўны комплекс.
Кульмінацыяй сустрэчы стала сумесная аўтамабільная пілігрымка ў Гудагайскі санктуарый, дзе пасля святой Імшы і малітоўнага вандравання сцежкамі мясцовай Кальварыі ўдзельнікі прасілі аб распазнанні асабістага жыццёвага шляху пераз абразом Маці Божай.
