10 чэрвеня ў 10 гадзін у гродзенскай парафіі Святога Духа адбудзецца ўрачыстае ўнясенне рэліквій св. Яна Паўла ІІ. Яго здзейсніць дапаможны біскуп Гродзенскай дыяцэзіі Юзаф Станеўскі. Пачатак у 10 гадзін.
Рэліквіі св. Яна Паўла ІІ першай ступені атрымаў 30 мая ў Кракаве пробашч парафіі Святога Духа кс. Павел Салабуда з рук кардынала Станіслава Дзівіша.
Як адзначыў кс. Павел, кардынал Дзівіш падчас перадачы рэліквій пажадаў, каб св. Ян Павел ІІ апекаваўся маладой гродзенскай парафіяй. У кароткай размове іерарх вельмі цікавіўся развіццём веры ў Беларусі, а асабліва ў гэтай парафіі.
Парафія Святога Духа ў гродзенскім мікрараёне Альшанка была заснавана ў 2012 г. За тры гады была пабудавана капліца, у якой змешчаны абраз св. Яна Паўла ІІ.
«Для нас гэта вельмі важная падзея, можна нават сказаць, гістарычная. Гэта будуць першыя рэліквіі святога ў новай і маладой парафіі. Цудоўна, што ўсё гэта адбываецца на пачатках будаўніцтва нашай святыні.
Мы хочам даверыць святому Папу будаўніцтва касцёла, а таксама ўсю нашу маладую парафію», — сказаў кс. Павел Салабуда.
