14 лістапада ў гродзенскай катэдры святога Францішка Ксавэрыя пройдзе цырымонія заканчэння Першага Сіноду Гродзенскай дыяцэзіі. Удзел у ёй прыме Апостальскі нунцый ў Беларусі арцыбіскуп Іньяцыё Чэффаліа.
Цырымонія пачнецца ў 11.00. Спачатку прысутным распавядуць аб працы Сіноду і азнаёмяць з яго статутамі. У 12.00 адбудзецца Імша з удзелам Апостальскага нунцыя ў Беларусі арцыбіскупа Іньяцыё Чэффаліа і беларускіх каталіцкіх іерархаў.
Біскуп Гродзенскі Уладзімір Гуляй запрашае на цырымонію ўсіх святароў, кансэкраваных асобаў і свецкіх вернікаў дыяцэзіі.
«Прашу вас узяць удзел у гэтай падзеі, важнай і гістарычнай для ўсёй нашай дыяцэзіяльнай супольнасці, каб падзякаваць Богу Усемагутнаму за сінадальны шлях і даручыць нашу дыяцэзію Божаму Провіду, апецы Маці Божай Міласэрнасці і ўсіх святых і благаслаўлёных нашай зямлі»,
— піша біскуп у звароце да вернікаў дыяцэзіі.
Сінод быў скліканы ў 2017 годзе біскупам Аляксандрам Кашкевічам, праходзіў пад дэвізам «Жыць Евангеллем».
