22 кастрычніка, калі Касцёл успмінае святога Яна Паўла ІІ, вернікі парафіі ў Смаргоні (Гродзенская дыяцэзія), якая носіць яго імя, адзначаюць парафіяльную ўрачыстасць.
Адпустовая святая Імша адбудзецца тут увечары. Ёй будзе папярэднічаць выстаўленне Найсвяцейшага Сакрамэнту і ружанцовае набажэнства — малітва, якой быў асабліва адданы святы Ян Павел ІІ.
Яно распачнецца ў 17.30; пачатак святой Імшы — у 18.30. На заканчэнне адбудзецца Эўхарыстычная працэсія.
Удзельнікі ўрачыстасці змогуць пачаставацца парафіяльнай кашай і гарачай гарбатай, а таксама паўдзельнічаць у бяспройгрышнай латарэі, галоўны прыз у якой — электрасамакат.
Акрамя таго, будуць падведзены вынікі конкурсу эскізу вітражоў для парафіяльнага касцёла, будаўніцтва якога ўжо падыходзіць да фінальнага этапу. Магчыма, найлепшыя з прадстаўленых прац будуць пазней рэалізаваныя ў святыні.
Пробашч смаргонскай парафіі ксёндз Яўген Учкуроніс ад імя ўсіх парафіянаў сардэчна запрашае ахвотных да ўдзелу ў парафіяльнай урачыстасці.
