20 сакавіка ў гродзенскім касцёле Маці Божай Анёльскай (францішканскі) будзе цэлебравацца святая Імша ў інтэнцыі ксяндза Яна Гавэцкага ў 30-ы дзень пасля яго смерці.
У супольнай малітве ўсе, хто пажадае ўзяць у ёй удзел, будуць дзякаваць Богу за дар ксяндза Яна і маліцца аб вечным жыцці для яго.
Пачатак у 11.00.
Ксёндз Ян Гавэцкі нарадзіўся 28 сакавіка 1962 года у Гродне. Паходзіў з парафіі Маці Божай Анёльскай.
Прэзбітэрскае пасвячэнне яму ўдзяліў 27 мая 1990 года ў гродзенскім фарным касцёле святога Францішка Ксаверыя, у той час першай у Беларусі малой базыліцы, арцыбіскуп эмэрыт Тадэвуш Кандрусевіч.
Пасля пасвячэння адзін год быў вікарыем парафіі святога Яна Хрысціцеля ў Шакяі (Літва). Потым вярнуўся на радзіму і ў 1991–1996 гадах быў пробашчам парафіі Нараджэння Найсвяцейшай Панны Марыі ў Трабах, з 1996 да 2021 год — пробашчам парафіі святых апосталаў Пятра і Паўла ў Іўі.
У 2022 г. быў прызначаны адміністратарам парафіі Маці Божай Шкаплернай (святога Юды Тадэвуша) у Прывалцы (дэканат Гродна-Усход).
У памяці тых, хто сустракаўся з ксяндзом Янам, ён застаўся як добры арганізатар розных душпастырскіх акцый і мерапрыемстваў. У час служэння ў івейскай парафіі ён стаў ініцыятарам правядзення там фестывалю калядных песень Gloria in excelsis Deo — адной з яскравых рэлігійных падзей жыцця Касцёла на Беларусі.
Таксама вернікі памятаюць яго як натхнёнага пілігрыма, які паклаў пачатак пешым пілігрымкам Івейскага дэканату ў дыяцэзіяльны санктуарый Маці Божай Каралевы нашых сем’яў у Тракелях.
Дзякуючы ксяндзу Яну шмат вернікаў мелі магчымасць наведваць многія санктуарыі Беларусі і замежжа.
Святар адышоў у вечнасць 20 лютага. Быў пахаваны 22 лютага на найстарэйшых каталіцкіх могілках Гродна.
