У субота 22 кастрычніка ў парафіі святога Казіміра і святой Ядзвігі ў Магілёве пройдзе ноч чування з навэннай да святой Ядзвігі.
Арганізатары чування айцы дамінікане запрашаюць ахвотных узяць удзел у супольнай малітве ў форме «хуткай» навэнна, што разлічана на дзевяць гадзін.
Праграма чування
- 22.00 – Навэнна – 1 – Адарацыя – Радасныя таямніцы (Фацімскі Ружанец).
- 23.00 – Навэнна – 2 – Таямніцы святла.
- 0.00 – Навэнна – 3 – Святая Імша (з нядзелі). Канферэнцыя на тэму веры.
- 1.00 – Навэнна – 4 – Перапынак, чытанне Паслання святога Паўла да Каласянаў, раздзелы 3 i 4.
- 2.00 – Навэнна – 5 – Крыжовы шлях са святой Ядзвігай.
- 3.00 – Навэнна – 6 – Адарацыя – Балесныя таямніцы.
- 4.00 – Навэнна – 7 – Вяночак да Божай Міласэрнасці.
- 5.00 – Навэнна – 8 – Хвалебныя таямніцы.
- 6.00 – Навэнна – 9 – Вяночак да святога арханёла Міхала.
Чуванне адбудзецца па адрасе:
горад Магілёў, Мінская шаша, 8б, парафія святога Казіміра і святой Ядзвігі.
Кантакты:
- тэл.: +375 (29) 291 92 11
- e-mail: schulzop@gmail.com
- viber: свЯдвіга1374
Просьба загадзя паведаміць пра сваю прысутнасць.
Увага! На чуванне запрашаюцца вернікі, якія пражываюць не толькі ў Магілёве. Варта запланаваць на нядзелю пасля вяртання дадому некалькі гадзінаў сну.
Інфармацыя ад арганізатараў
- Духоўная мэта навэнны
Мы прагнем выпрошваць Божыя ласкі разам са святой Ядзвігай у чуванні, малітве і посце, прыняўшы святую Камунію ў важных інтэнцыях. Верым, што дзякуючы ўмацаванню нашых блізкіх адносін са святой Ядзвігай, каралевай, і наследаванню яе цнотаў, мы можам спадзявацца на яе магутнае заступніцтва перад Богам і разлічваць на яе каралеўскую шчодрасць. Гэтую навэнну можна назваць «хуткаю», таму што мы памолімся яе за дзевяць гадзін. Плануецца, што гэта будзе першая з дзевяці навэннаў, калі мы вытрываем у іх на працягу дзевяці месяцаў. За дзевяць месяцаў дзіця ва ўлонні маці развіваецца і потым нараджаецца. На працягу дзевяці месяцаў мы таксама хочам развівацца духоўна — пазнаваць і вучыцца наследаваць дзевяць цнотаў святой Ядзвігі: веру, надзею, любоў, разважлівасць, справядлівасць, устрыманасць, мужнасць, пакору, хочам таксама пашыраць спакой, спрыяючы паяднанню.
- Пост — экзарцызм
Просім, каб тыя вернікі, якія вырашаць узяць удзел у чуванні, паводле сваіх магчымасцяў трымалі пост у суботу 22 кастрычніка (напрыклад, пост на хлебе і вадзе; толькі на вадзе; адзін пасілак на працягу дня з адпаведнаю колькасцю напояў і г.д.). Варта ўзяць з сабою бутэрброды на супольны пасілак пасля святой Імшы — у нядзелю мы не посцім. Памятайма, што Апосталы не маглі выгнаць злога духа, таму што некаторых злых духаў можна выгнаць толькі малітваю і постам. Няхай наш пост будзе просьбаю аб вызваленні свету ад зла — своеасаблівым малым экзарцызмам.
- Начное чуванне
Навошта патрэбна ноч чування? Нам жа будзе цяжка на наступны дзень, мы будзем стомленыя. Навошта такая ахвяра?
Прыкладам для нас з’яўляецца Пан Езус: «Ён узышоў на гару памаліцца і правёў усю ноч у малітве да Бога» (Лк 6, 12). Святая Ядзвіга напісала ў Акце фундацыі Карлава ўніверсітэта ў Празе: «Мы правялі вельмі шмат бяссонных начэй, разважаючы над тым, як рэалізаваць задуму сэрца».
Сапраўдная любоў патрабуе ахвяры, да таго ж мы жывем у цяжкія дні нашай гісторыі. Прагнем прысвяціць малітве ў важных інтэнцыях адну ноч у месяц каля рэліквій святой Ядзвігі. Мы будзем прасіць Бога за свет, за Еўропу, Беларусь і Касцёл. Будзем маліцца ў інтэнцыі спакою, за кіраўнікоў дзяржаваў, аб новых пакліканнях да святарства, у нашых асабістых інтэнцыях і ў тых інтэнцыях, якія былі запісаныя ў Кнізе просьбаў да святой Ядзвігі падчас Ружанцовага кангрэсу. Прагнем таксама ўміласціўляць Бога за свае грахі і грахі нашых бліжніх, а таксама прасіць, каб споўніліся жаданні Маці Божай з Фацімы.
Тыя вернікі, якія жадаюць яднацца з намі духоўна, могуць даслаць свае інтэнцыі праз СМС, e-mаil або на Viber.
Калі Бог дазволіць, мы плануем арганізаваць дзевяць такіх начных чуванняў, раз на месяц, у трэцюю або чацвёрную суботу месяца, з кастрычніка 2022 да чэрвеня 2023 года.
Інфармацыя будзе змяшчацца на Viber: CвЯдвіга1374.
